२४ चैत, काठमाडौं । सर्वोच्च अदालतले अवहेलना मुद्दामा नेपाली कांग्रेसका सभापति शेरबहादुर देउवाको नाममा कारण देखाउ आदेश जारी गरेको छ । बिहीबार मुद्दामा सुनुवाई गर्दै न्यायाधीश ईश्वरप्रसाद खतिवडाको इजलासले कारण देखाउ आदेश जारी गरेको छ । आदेशमा १० दिनभित्र लिखित जवाफसहित उपस्थित हुन भनिएको छ । अधिवक्ता हरि मैनालीले प्रहरी महानिरीक्षक नियुक्ति प्रकरणमा कांग्रेस केन्द्रीय समितिले निर्णय र सभापति शेरवहादुर देउवाको अभिव्यक्तिले अदालतको अवहेलना भएको भन्दै सर्वोच्चमा रिट दायर गरेका थिए । सर्वोच्चको पूर्ण इजलासले डीआईजी जयबहादुर चन्दलाई प्रहरी महानिरीक्षकमा बढुवा गर्ने सरकारको निर्णय खारेज गर्दै चार वर्षको कार्यमूल्यांकनमा पहिलो नम्बरमा परेकालाई प्रहरी प्रमुख बनाउन परमादेश दिएको थियो । तर उक्त आदेशमा कांग्रेसले आपत्ति जनाएको थियो । अदालतको अवहेलना ठहर भएमा १ वर्षसम्म कैद, १ लाख रुपैयाँसम्म नरिवाना वा दुबै सजाय हुन सक्छ ।
प्रकाशित मिति: बुधबार, चैत २३, २०७३
