२३ चैत, काठमाडौँ । नेपाल–भारत प्रबुद्ध व्यक्ति समूह (इपिजी) सन् १९५० को नेपाल–भारत शान्ति तथा मैत्री सन्धिका असमान व्यवस्था हटाउन सहमत देखिएको छ । बुधबारदेखि काठमाडौंमा सुरु भएको इपिजीको तेस्रो बैठकमा दुबै पक्षका प्रतिनिधि यो विषयमा सहमत भएका हुन । बैठकमा सहभागी नेपाली पक्षका एक जना प्रतिनिधिले नेपालले उठाउँदै आएको १९५० को सन्धिका असमान व्यवस्था हटाउन भारतीय पक्ष सकारात्मक भएको जनकारी दिए । नेपालमा राणा शासन धर्मराउँदै गरेको र उत्तरी छिमेकी तिब्बतमा चिनियाँ हस्तक्षेप भइरहेका बेला तत्कालीन राणा प्रधानमन्त्री मोहनसम्शेरले भारतसँग उक्त शान्ति तथा मैत्री सन्धि गरेका थिए । सन्धिका प्रायः सबै धारामा नेपालका राजनीतिक दलले असन्तुष्टि जनाउँदै आएका छन् । गत असारमा काठमाडौंमा सम्पन्न इपिजीको पहिलो बैठकमै सन् १९५० को नेपाल–भारत शान्ति तथा मैत्री सन्धिलाई छलफलका लागि प्रवेश गराइएको थियो । नेपाल–भारतबीचका सम्पूर्ण सन्धि सम्झौता र प्रावधानको पुनरवलोकन गर्ने निर्णय पहिलो बैठकले गरेको थियो । त्यसैको आधारमा भारतमा कात्तिक तेस्रो साता सम्पन्न इपिजीको दोस्रो बैठकमा नेपालले उक्त सन्धिलाई विशेष महत्वका साथ उठाएको थियो ।
प्रकाशित मिति: मंगलबार, चैत २२, २०७३
