२० चैत, काठमाडौँ । काठमाडौँको तारकेश्वर नगरपालिका क्षेत्रमा म्याद नाघेका औषधिहरु खुलेआम विक्री भइरहेको तथ्य सार्वजनिक भएको छ । तारकेश्वर नगरपालिकाको नेपालटारमा म्याद नाघेका औषधि बिक्रीहुने गरेको स्वयम् उपभोक्ताले बताएका छन । नेपालटारको महादेव खोला पुलको मुखैमा रहेको कात्यानी पोलीक्लिनक र गुरुङ फर्माले म्याद नाघेको औषधि बिक्री गरेको प्रमाण आजको न्युजले भेटेको छ । नुवाकोट स्थायी घर भई हाल तारकेश्वर नगरपालिका वडा नं. २० मा बसोबास गर्दै आएका रामराजा थापा बेस्सरी खोकी लागेपछि नजिकैको गुरुङ फर्मामा गए त्यहाँ रहेका औषधि बिक्रेताले ब्रीका बिएम नामको औषधि दिए । उनले पैसा कति हो भनेर सोधे ७५ रुपैयाँ भन्ने उत्तर आएपछि त्यही रकम तिरेर उनी घर गए । घर पुगेपछि औषधि खानुअघि औषधिको बाहिरपट्टीको खोल पढे त्यसपछि उनी छांगाबाट खसेजस्तो भए । किनकी उनले किनेको औषधिको म्याद नाघेको थियो । त्यसछि उनले उक्त औषधि प्रयोग गरेनन् त्यतिकै राखीरहेका छन । उनले यस्तो हेलचक्राई गर्ने मेडिकल सञ्चालकलाई कारबाहीको माग गरेका छन । यस्तैगरी समय समयमा हुने बजार अनुगमनको क्रममा औषधि व्यवसायीले म्याद नाघेका औषधि खुलेआम बिक्री वितरण गरिरहेको फेला परेको भए पनि कुनै कारबाही हुने गरेको छैन ।
के हुन्छ म्याद नाघेको औषधि प्रयोग गरे ?
औषधि निश्चित समयभित्र प्रयोग गर्नुपर्ने हुन्छ । अथवा जुनसुकै औषधि पनि निश्चित समय मात्र उपयोग गर्न योग्य मानिन्छ । म्याद नाघेका वा अन्य कुनै कारणले नष्ट गर्नुपर्ने भएमा त्यस्ता औषधीहरुलाई विश्व स्वास्थ्य संगठनले तोकेको मापदण्ड पूरा गरेर मात्र नष्ट गर्नुपर्ने हुन्छ । नियमित अनुगमन र उपभोक्ताको चेतनाको कमीले गर्दा नेपालमा औषधि व्यवसायी तथा उत्पादकहरुले विश्वव्यापी स्थापित मान्यता पालना नगरी नै म्याद नाघेका औषधिको समेत बिक्री गरिरहेका छन् । छन त उनीहरुले स्थापित मान्यता अनुसार औषधिको व्यवस्थापन गर्न सकेको छन । म्याद नाघेको औषधिलाई सही रुपमा नष्ट नगर्दा त अनेकथरी समस्या निस्क्ने सम्भाना हुन्छ भने प्रयोग नै गरेपछि त्यसको असर के होला सहजै अनुमान गर्न सकिन्छ । चिकित्सकहरुका अनुसार म्याद नाघेको औषधि सेवन गर्दा विभिन्न साइड इफेक्ट समेत हुन्छ ।
प्रकाशित मिति: आइतबार, चैत २०, २०७३
