२१ चैत, काठमाडौँ । स्थानीय निर्वाचनका कारण नेपाल पत्रकार महासंघको महाधिवेशन एक महिना पर धकेलिएको छ । प्रत्येक तीन वर्षको मे ३ अर्थात विश्व प्रेस स्वतन्त्रता दिवसको अवसरमा हुने महासंघले महाधिवेशन यसवर्ष जुन ३ मा गर्ने निर्णय भएको अध्यक्ष डा महेन्द्र विष्टले जानकारी दिनुभयो । उहाँले २०७४ बैशाख ३१ गते मुलुकमा १९ वर्षपछि स्थानीय तहको निर्वाचन हुने घोषणा भइसकेका कारण उत्पन्न विशेष परिस्थिति र त्यस्तो संवेदनशील समयमा पत्रकारहरूले स्थलगत रिपोर्टिङ र समाचारकक्षमा निर्वाह गर्नुपर्ने विशेष दायित्वलाई समेत मध्यनजर गर्दै महासंघको केन्द्रीय समितिको पूर्ण बैठकले २५औं महाधिवेशन सार्ने निर्णय भएको जानकारी दिनुभयो । उहाँले मे ३ कै दिन महाधिवेशन गर्न सम्भव हुने अवस्था बनेमा सचिवालयले मिति तय गर्नसक्ने गरी अधिकार प्रत्यायोजन भएको समेत जानकारी दिनुभयो ।
१ सय १ सदस्यीय मूल व्यवस्थापन समिति गठन
बैठकले महाधिवेशन भव्यरूपमा सफल पार्न अध्यक्ष डा. महेन्द्र विष्टको अध्यक्षतामा कार्यसमिति पदाधिकारी तथा सदस्य, लेखासमिति संयोजक तथा सदस्य, सल्लाहकार, पूर्व अध्यक्ष, वरिष्ठ पत्रकार, सञ्चारसम्बद्ध संघ/संस्थाका प्रतिनिधिसहित १ सय १ सदस्यीय मूल व्यवस्थापन तयारी समिति गठन गरेको छ । त्यस्तै उपाध्यक्ष खिलबहादुर भण्डारीको संयोजकत्वमा आवास, उपाध्यक्ष अनिता बिन्दुको संयोजकत्वमा भोजन, महासचिव उजिर मगरको संयोजकत्वमा प्रचार÷प्रसार, सचिव प्रभात चलाउनेको संयोजकत्वमा स्मारिका प्रकाशन, सचिव संगिता खड्काको संयोजकत्वमा स्वागत, सचिव ध्रुब लम्सालको संयोजकत्वमा स्वयंसेवक, कोषाध्यक्ष सूर्यमणि गौतमको संयोजकत्वमा आर्थिक स्रोत परिचालन, सदस्य प्रकाश तिम्लसिनाको संयोजकत्वमा मञ्च व्यवस्थापन, सदस्य ईश्वरी वाग्लेको संयोजकत्वमा यातायात, रामहरि सिलवालको संयोजकतत्वमा प्रतिनिधि सामग्री व्यस्थापन, सदस्य रोशन पुरीको संयोजकत्वमा स्वास्थ्य लगायतका उपसमितिहरू पनि गठन गरेको छ ।
निर्वाचनको जिम्मा प्राध्यापक खनाललाई
बैठकले २५औं महाधिवेशनको निर्वाचन प्रक्रिया सञ्चालन गर्न प्राध्यापक चिरञ्जिवी खनालको संयोजकत्वमा ५ सदस्यीय केन्द्रीय निर्वाचन समिति पनि गठन गरेको छ । बैठकले अधिवेशन सम्पन्न हुन बाँकी शाखा तथा एशोसियट संस्थाहरूको अधिवेशन तत्काल गर्न र अधिवेशन सम्पन्न भई प्रतिवेदन प्राप्त हुन बाँकी रहेका शाखा एशोसियट संस्थाहरूलाई तत्काल प्रतिवेदन पठाउन बैठकले पुनः आह्वान गरेको छ । आगामी वैशाख ७ गतेभित्र अधिवेशन सम्पन्न हुन नसकेका शाखाले २५औं महाधिवेशनमा सहभागी हुन नसक्ने गरी बैठकले निर्णय गरेको महासचिव उजिर मगरले जानकारी दिनुभयो । उहाँले इलाम र पाँचथर शाखाको विवादलाई स्थलगत भ्रमणसमेत गरेर सहमतिमा टुंग्याउन र ताप्लेजुङको गुनासो पनि सुनुवाई गर्न क्षेत्रीय संयोजक र सहसंयोजकसहित तीन सदस्यीय समितिलाई जिम्मेवारी सुम्पिएको बताउनुभयो ।
प्रकाशित मिति: आइतबार, चैत २०, २०७३
