११ चैत, काठमाडौँ । नेपाली सेनाको प्रवक्ताको जिम्मेवारी सहायक रथी झंकर बहादुर कडायतले पाउनुभएको छ । सैनिक जनसम्पर्क निर्देशनालयको निर्देशक तथा नेपाली सेनाको प्रवक्ताको जिम्मेवारी शुक्रबारबाट कडायतले सम्हालनु भएको निर्देशनालयले जनाएको छ । उपरथी तारा बहादुर कार्कीले निर्देशनालयमा आयोजित एक कार्यक्रममा कडायतलाई कार्यभार हस्तान्तरण गर्नु भएको छ । करिव १८ महिना सैनिक जनसम्पर्क निर्देशक तथा सैनिक प्रवक्ताको जिम्मेवारी निर्वाह गर्ने सिलसिलामा सञ्चार जगतका सवै मिडिया हाउस, प्रकाशक, सम्पादक तथा बिशेषगरी डिफेन्स विटसँग सम्बद्ध पत्रकारहरुबाट प्राप्त सद्भाव, शुभेच्छा र सहयोगका लागि मानार्थ उपरथी कार्कीले आभार प्रकट गर्नु भएको छ । उहाँले सञ्चार जगतको अहम् भुमिकाको उच्च कदर गर्दै सेना र संचार जगत बीचको सम्बन्धमा सदाझंै हार्दिक सहयोग र शुभेच्छा नवनियुक्त सैनिक प्रवक्तालाई प्राप्त हुने नै विश्वास व्यक्त गर्नुभयो ।
प्रकाशित मिति: शुक्रबार, चैत ११, २०७३
