७ चैत, काठमाडौँ । नेपाल प्रहरीको महानिरिक्षकमा जयबहादुर चन्दलाई नियुक्त गर्ने सरकारको निर्णय बिरुद्ध परेका मुद्दामा सर्वोच्च अदालतको पूर्ण इजलासमा सोमबारबाट बहस सकिएको छ । बहस हिजाे सकिएपनि मुद्दाको फैसला भने अाजमात्र हुने भएको छ । प्रधानन्यायाधीश सुशीला कार्की नेतृत्वको पूर्ण इजलासमा भएको बहसमा डीआईजी जयबहादुर चन्द पक्षका वकिलले बहस गरेनन् । सोमबार सरकारी वकिलको तर्फबाट दुई उपमहान्यायाधिवत्ता टीकेन्द्र दाहाल र रेवती त्रिपाठीले बहस गरेका छन् । चन्द पक्षका वकिलहरु अनुपस्थित भएपछि माइकिङ गरेर नाम बोलाइएको थियो । तर, सुशील पन्त, प्रेमबहादुर खड्का, महादेव यादव, सतिश खरेल लगायत वरिष्ठ अधिवक्ताहरु गएनन् ।रिट निवेदन कपिलदेव ढकाल र डीआईजी नवराज सिलवालका वकिलले आइतबार नै बहस गरेका थिए । सिलवालका तर्फबाट बद्रीबहादुर कार्की, तुलसी भट्ट, भीमार्जुन आचार्य र टिकाराम भट्टराईले बहस गरेका थिए ।बहस सकिएपनि प्रधानन्यायाधीश कार्कीले सर्वोच्च अदालतको बाषिर्क प्रतिवेदन बुझाउन राष्ट्रपति कार्यालय जानु परेका कारण सोमबार फैसला आउन सकेन ।
प्रकाशित मिति: आइतबार, चैत ६, २०७३
