२६ भदौ, ताप्लेजुङ । कञ्चनजंघा र पाथीभरा मन्दिर प्रवेशद्वारका रुपमा रहेको ताप्लेजुङको एकमात्र सुकेटार विमानस्थलबाट लामो समयदेखि उडान नहुँदा यात्रु मर्कामा परेका छन् । मौसम खरावीकै कारण गत असारदेखि यहाँ हवाईसेवा बन्द छ । नेपाल वायुसेवा निगमले साताको बुधबार र शुक्रबार काठमाडौँ–ताप्लेजुङ उडान भर्दै आएको थियो । लामो समयदेखि उडान रोकिएपछि बाह्य तथा आन्तरिक पर्यटक कठिन यात्रा गर्न बाध्य छन् । मेची राजमार्गअन्तर्गत पहाडी क्षेत्रको सडकमा पहिरो झर्नेलगायतका कारण दुर्घटनाको जोखिम अत्यधिक हुन्छ । प्रायः यात्रुले हवाई यात्रालाई नै रोज्ने गरेका छन् । बिरामीले पनि उपचारका लागि हवाईसेवा उपभोग गर्ने गरेका छन् । जिल्लामा बाह्य तथा आन्तरिक पर्यटकको ओहोरदोहोर निकै बाक्लो हुने गर्छ । दशैँ तिहारलगायतका चाडाबाड नजिकिँदै जाँदा उडान नहुँदा टिकट बुकिङ गर्न नसकिएको नेपाल वायुसेवा निगम ताप्लेजुङका प्रमुख विकास राईले बताए । मौसममा सुधार आए उडान हुन सक्ने बताए ।
प्रकाशित मिति: आइतबार, भदौ २५, २०७४
-1732776560.jpg)
