२० भदौ, काठमाडौं । शिक्षा मन्त्रालयले साझा प्रकाशनका अध्यक्षले राजिनामा दिएको भन्ने कुरा गलत भएको जनाएको छ । शिक्षा मन्त्रालयका प्रवक्ता डा. हरि लम्सालले साझा प्रकाशनका अध्यक्ष डोलिन्द्र शर्मा र सञ्चालकहरुको राजिनामा हालसम्म शिक्षा मन्त्रालयमा नआएको भन्दै राजिनामाको कुरा झुट भएको बताएका छन । अाइतबार शर्मासिहत सञ्चालकहरू प्रदीप नेपाल, दीनानाथ शर्मा र डा कृष्णिहरि बरालले संयुक्त रूपमा राजिनामा दिएको कुरा बाहिर सार्वजनिक भएको थियो । मन्त्रालयले अख्तियार दुरुपयोग अनुसन्धान आयोगलाई पत्र लेख्दै साझाको भ्रष्टाचाको सम्बन्धमा अनुसन्धान गरी कारबाही प्रक्रिया अघि बढाउन आग्रह गरेको छ । यसअघि मन्त्रालयले आन्तरिक रुपमा छानबिन गरेको थियो । छानबिन समितिले बुझाएको प्रतिवेदनलाई अख्तियारमा पठाइएको हो । मन्त्रालयले साझा प्रकाशनका अध्यक्ष तथा महाप्रवन्धक डोलिन्द्र प्रसाद शर्माले पदको दुरुपयोग गरी करोडौं रकम हिनामिना गरेको आरोप लाग्दै आएको छ । प्रवक्ता लम्सासका अनुसार साझाका अध्यक्ष शर्मासँग मन्त्रालयले किन कारबाही नगर्ने भन्दै तीन दिने स्पष्टिकरण सोधेको छ ।
प्रकाशित मिति: सोमबार, भदौ १९, २०७४
-1732776560.jpg)
