काठमाडौं । सर्वोच्च अदालतमा गत भदौ १७ गते मध्यरातमा भएको आगलागीमा भ्रष्टाचार मुद्दाका मिसिल तथा कागजातसमेत जलेको भेटिएको छ।
सिंहदरबार छेउस्थित सर्वोच्च अदालतको नयाँ भवनको भुइँतलामा भएको आगलागीमा अन्डरग्राउन्डमा राखिएका विभिन्न मुद्दाका फाइल तथा कागजपत्र जलेका हुन्। आगलागी राति साढे १ बजेतिर सुरु भएको थियो।
आगलागीको कारण पत्ता लगाउन सर्वोच्च प्रशासन र प्रहरीले छुट्टाछुट्टै अनुसन्धान गरिरहेका छन्। प्रारम्भिक अनुसन्धानमा विद्युत् सर्ट भएर आगलागी भएको आशंका गरिएको थियो। तर, अनुसन्धानबाट ठोस निष्कर्ष आइसकेको छैन। फरेन्सिक विज्ञहरूले पनि घटनास्थलबाट आगलागीका अवशेष संकलन गरेर लगेका छन्।
आगलागी सुरु भएको केही समयमै नियन्त्रणमा लिइएका कारण ठूलो क्षति हुनबाट जोगिएको बताइएको छ। तर, आगलागीपछि भ्रष्टाचार मुद्दाका मिसिल, प्रमाण तथा कागजात जलेका अवशेष भेटिएका छन्।
सर्वोच्च प्रशासन स्रोतका अनुसार जेनजी आन्दोलनका क्रममा २०८२ भदौ २४ मा भएको आगजनीबाट बचेका केही मिसिल तथा कागजातसमेत पछिल्लो आगलागीमा परेको हुन सक्ने देखिएको छ।
त्यस्तै, सर्वोच्च अदालतको नयाँ भवन निर्माणसँग सम्बन्धित महत्त्वपूर्ण कागजात तथा अभिलेखसमेत जलेको हुन सक्ने आशंका गरिएको छ। सर्वोच्च प्रशासनका एक अधिकारीले आगलागी भवितव्य हो वा अवाञ्छित तत्वको संलग्नता छ भन्ने विषय अनुसन्धान प्रतिवेदनबाट स्पष्ट हुने बताए।
महालेखा परीक्षकको प्रतिवेदनले तत्कालीन प्रधानन्यायाधीश चोलेन्द्रशमशेर राणाको कार्यकालमा गरिएको सर्वोच्च अदालतको नयाँ भवन निर्माणको ठेक्का प्रक्रियामाथि प्रश्न उठाएको थियो। यही ठेक्का प्रकरण राणामाथि महाभियोग लगाउने कारणमध्ये एक बनेको थियो।
महालेखाले भवन निर्माणको ठेक्का प्रक्रियामा प्रतिस्पर्धा र मितव्ययिताको विषयमा प्रश्न उठाउनुका साथै सहरी विकास मन्त्रालयको जिम्मेवारी र क्षेत्राधिकारसमेत अतिक्रमण भएको उल्लेख गरेको थियो।
नयाँ भवनको ठेक्का अनियमिततासम्बन्धी विषयमा अख्तियार दुरुपयोग अनुसन्धान आयोगमा समेत उजुरी परेको थियो र आयोगले सम्बन्धित कागजात मगाएको थियो। आगलागीमा त्यस्ता कागजात तथा अभिलेखसमेत नष्ट भएको हुन सक्ने आशंका गरिएको छ।
आगलागीको अनुसन्धान प्रतिवेदन सार्वजनिक हुन ढिलाइ भइरहेका कारण घटनाबारे जनमानसमा थप शंका र चासो बढेको छ।
प्रकाशित मिति: बिहीबार, भदौ २५, २०८३
