६ भदौ, काठमाडौँ । नेकपा एमालेका उपाध्यक्ष वामदेव गौतमले प्रधानमन्त्री हुने बित्तिकै ओहोदाको प्रमाणपत्र बुझाउन गएजस्तो गरि भारत भ्रमण गर्ने प्रबृति गलत भएको बताएका छन । मंगलबार अनेरास्वबियु केन्द्रीय कमिटीद्वारा राजधानीमा आयोजित ‘सीमा समस्या, तराई डुबानको कारण र दीर्घकालीन समस्याको उपाय’ विषयक अन्तरक्रियामा बोल्दै उपाध्यक्ष गौतमले भारत भ्रमणका बेला नेपालीको स्वीकृति बिना बनाईएका सबै बाँधहरु भत्काउने निर्णय गरेर आउन प्रधानमन्त्री शेरबहादुर देउवालाई आग्रह गरे । सोही कार्यक्रममा विकास समितिका सभापति रबिन्द्र अधिकारीले अनेरास्ववियु राष्ट्रियताको पहरेदार भएको र विगतमा कालापानी, सुस्ता र लक्ष्मणपुर बाधको बिरुद्धमा अनेरास्ववियुले सञ्चालन गरेको आन्दोलनको स्मरण गराउदै आज पनि अनेरास्ववियुले दबाब र जागरणको भुमिका जारी राख्नुपर्ने बताए । कार्यक्रममा सीमाविद्द्वय बुद्विनारायण श्रेष्ठ र हिरण्यलाल श्रेष्ठले असमान सन्धीको कारण यो समस्या आएको र असमान सन्धी खारेजीनै समस्या समाधानको उपाय भएको बताए । अनेरास्ववियुकी अध्यक्ष नविना लामाको सभापतित्वमा सम्पन्न कार्यक्रमको उद्देश्य प्रधानमन्त्रीको भारत भ्रमणका क्रममा राष्ट्र हितबिपरीत कुनै सन्धि सम्झौतामा हस्ताक्षर नगर्न सुझाब र दबाब दिने रहेको अनेरास्ववियुका प्रवक्ता सुदिप शर्माले बताए ।
प्रकाशित मिति: मंगलबार, भदौ ६, २०७४
-1732776560.jpg)
