काठमाडौं । उद्योगमन्त्री गौरी यादवले मुलुकमा देखिएको ग्यास अभावको समस्या समाधान हुन नसक्नुमा कर्मचारीतन्त्र र ग्यास व्यवसायी जिम्मेवार रहेको आरोप लगाएकी छन् । कर्मचारीले आफूलाई सहयोग नगरेका कारण आफूले चाहेजस्तो काम गर्न नसकेको उनको गुनासो छ ।
बुधबार उद्योग समितिको बैठकमा बोल्दै मन्त्री यादवले कर्मचारीहरू उद्योगीको प्रभावमा चल्ने गरेको आरोप लगाइन् । आफूले दिएको निर्देशनसमेत कर्मचारीले अटेर गर्ने गरेको भन्दै उनले ग्यास व्यवसायीलाई कडाइ नगरेसम्म आपूर्ति सहज हुन नसक्ने दाबी गरिन् ।
उनले नेपालमा रहेका ५८ वटा ग्यास उद्योगको संख्यामाथि प्रश्न उठाउँदै ठूलो देशमा समेत सीमित संख्यामा ग्यास उद्योग रहेको दाबी गरिन् ।
‘हामीसँग ग्यास उद्योग ५८ वटा छ । अब ५९ वटा बनाउने हो कि होइन ? हाम्रो जस्तो देशमा दुई वटाभन्दा बढी ग्यास उद्योग चाहिएको छैन । साँच्चिकै सोध्नुहुन्छ भने धेरैमा दुईवटा । सबै खारेज गर्नुपर्छ,’ उनले भनिन् ।
ग्यास आपूर्ति सहज बनाउन आफूले उद्योगीहरूसँग पटक–पटक आग्रह गरेको तर त्यसबाट समस्या समाधान नभएको मन्त्री यादवले बताइन् ।
‘मैले पनि हात जोडेरै सबैलाई भनेको छु कि ग्यासको आपूर्ति सहज बनाइदिनुस् । सबै उद्योगीहरूलाई बसाएर भनेको छु । तर हात जोडेर नहुँदोरहेछ भनेर बुझियो,’ उनले भनिन् ।
मन्त्री यादवले कर्मचारीतन्त्र उद्योगीको प्रभावमा रहेको आरोप लगाउँदै आफूले कानुन तथा विधेयकमा आवश्यक परिवर्तन गर्न खोज्दा समेत कर्मचारीबाट असहयोग भएको बताइन् ।
‘तपाईं भन्नुस्– यो चेन्ज गरेर ल्याउनुस्– “हुँदैन, मिल्दैन हजुर” भन्छन् । तपाईं १० चोटि भन्नुस्, “मिल्दैन” भनेर भन्छन् । के गरौँ ?’ उनले प्रश्न गरिन् ।
वर्तमान सरकार बलियो भए पनि कर्मचारीले काम गर्न नदिएको उनको गुनासो थियो ।
‘यस्तो बलियो सरकारमा त यो हाल छ भने कर्मचारीहरूको… अहिले यस्तो बलियो सरकारमा त कर्मचारीहरूले केही चल्न दिएको छैन,’ उनले भनिन् ।
कर्मचारीहरूले उद्योगीले भनेअनुसार विधेयक तथा नियम बनाउने गरेको आरोप लगाउँदै मन्त्री यादवले कर्मचारीतन्त्रमा सुधार आवश्यक रहेको बताइन् ।
‘म धेरै चेन्ज गर्न खोजिरहेको छु, तर गर्न सकिरहेको छैन । कर्मचारीले साथ नदिएसम्म तपाईं केही पनि गर्न सक्नुहुन्न,’ उनले भनिन्, ‘यो कर्मचारीतन्त्रलाई सुधार्नुपर्ने बेला आएको छ ।’
नेपालमा उद्योग सञ्चालनका लागि उपयुक्त वातावरण नरहेको दाबी गर्दै उनले विद्यमान नियम–कानुन उद्योगीको हितअनुकूल बनाइएको आरोपसमेत लगाइन् ।
उनले आफूले सुधारका प्रयास गर्दा उद्योगीहरूबाट आफूलाई लक्षित गर्ने काम भइरहेको दाबी गरिन् ।
‘चेन्ज गर्न खोज्दा तपाईं सबैको आँखाको तारो म बनेको छु । सबै उद्योगीहरूले मलाई टार्गेट गरिरहेका छन्,’ उनले भनिन् ।
मन्त्री यादवले सरकारी समितिहरूबाट उद्योगीहरूको प्रभाव हटाउनुपर्ने धारणा राखिन् । देशहित र राष्ट्रहितलाई केन्द्रमा राखेर कानुन निर्माण गर्नुपर्ने उनको भनाइ थियो ।
नेपालमा ५८ वटा ग्यास उद्योग आवश्यक नरहेको दाबी गर्दै उनले उद्योगको लाइसेन्स वितरणमा आर्थिक चलखेल हुने गरेको आरोपसमेत लगाइन् ।
बैठकमा मन्त्री यादवले आफू व्यक्तिगत रूपमा आलोचित भए पनि देशहितका लागि सुधारको प्रयास जारी राख्ने बताइन् ।
‘म यो देशलाई हाँसेको हेर्न चाहन्छु । यसले मलाई धेरै प्रभाव पनि पार्छ, मलाई थाहा छ । मलाई एकदमै नराम्रो बनाउला, आज म यो विषयमा यति अगाडिसम्म बढेर बोल्दा । तर देशको लागि गर्ने हो भने यो हामीले बुझ्नैपर्ने कुरा हो । पार्टीको कुरा होइन, देशको कुरा हो,’ उनले भनिन् ।
अन्त्यमा उनले ग्यास उद्योगीमाथि कडाइ नगरेसम्म ग्यास आपूर्ति सहज नहुने आफ्नो निष्कर्ष रहेको बताइन् ।
‘त्यो उद्योगीहरूलाई पाता नफर्काएसम्म यो ग्यास सहज हुँदैन भनेर मेरो अन्तिम विश्लेषण यही हो,’ उनले भनिन् ।
प्रकाशित मिति: बुधबार, भदौ २४, २०८३
-1784890653-1788942355.jpg)
