काठमाडौँ । नेपालमा एक साता भित्रै चिनियाँ खोप आइपुग्ने भएको छ । कोरोना भाइरस(कोभिड–१९) विरुद्धको चिनिया भेरोसेल खोप एक साता भित्रै नेपाल आइपुग्ने स्वास्थ्य तथा जनसङ्ख्या मन्त्रालयका अधिकारीहरूले जानकारी दिएका छन् ।
मन्त्रालयका एक उच्च अधिकारीका अनुसार पहिलो लटमा १० लाखदेखि २० लाख मात्रासम्म आउने सम्भावना रहेको छ । कूल ४० लाख मात्रा भेरोसेल खोप ल्याउने कुरा भएको छ तर यसबारे सूचना सार्वजनिक गरेको छैन ।
ती खोप नन डिस्क्लोजर एग्रिमेन्ट’ अनुसार ल्याउन लागिएको बताइएको छ । सरकारले तत्काल खोपको अभाव भइरहेको वेला चिनियाँ कम्पनीको सर्तमा खोपको मूल्य सार्वजनिक नगर्ने सहमतिअनुसार खोप ल्याउन बाध्य भएको बताइएको छ ।
स्रोतका अनुसार यसअघि सरकारले खरिद गरेको कोभिसिल्ड खोपको दाँजोमा भेरोसेलको मूल्य दोब्बरभन्दा बढी परेको छ। पहिलो लटको १० लाखदेखि २० लाख मात्राबाहेक थप खरिदमा उल्लेख्य रूपमा मूल्य कम हुने गरी दुवै पक्षबीच अनौपचारिक कुरा भएको छ ।
यसअघि चीन सरकारले दुई पटकसम्म गरी १८ लाख भेरोसेल खोप अनुदानमा उपलब्ध गराइसकेको छ ।
त्यसै गरी भारतबाट २० लाख मात्र कोभिसिल्ड खोप प्रतिमात्रा ४ डलरमा खरिद गरिएको छ । उक्त खोपको बाँकी मात्रा नेपालले अझै पाउन सेकेको छैन । सिरम इन्स्टिच्युट अफ इन्डियाले २०२१ को अन्तसम्म दिन सकिने भन्दै आइरहेको छ ।
भेरोसेल खोप चीनको बेइजिङ इन्स्टिच्युट अफ बायोलोजिकल प्रोडक्ट्स कम्पनी लिमिटेड (बीआईबीपी) सिनोफार्मअन्तर्गत उत्पादित ‘कोभिड–१९ भ्याक्सिन (भेरोसेल) इनएक्टिभेटेड भ्याक्सिन’ हो ।
प्रकाशित मिति: बिहीबार, असार १७, २०७८
-1732776560.jpg)
