काठमाडौँ । सरकारले चिनियाँ कम्पनी सिनोफर्मसँग ४० लाख डोज खोप किन्ने भएको छ । सोमबार बसेको मन्त्रिपरिषद् बैठकले खोप खरिद प्रक्रिया अघि बढाउन स्वास्थ्य तथा जनसङ्ख्या मन्त्रालयलाई सहमति दिएको हो ।
नेपालले खोप खरिदका लागि प्रस्ताव गर्दा चिनियाँ कम्पनीले मूल्य लगायतका विषय सार्वजनिक नगर्ने गरी ‘नन डिस्क्लोजर एग्रिमेन्ट’ गर्नुपर्ने बताएको थियो । स्वास्थ्य सेवा विभागले त्यही कारण खरिद प्रक्रिया अघि बढाउन सकेन ।
तर अरू कम्पनीसँग खरिद प्रक्रिया अघि नबढेपछि चिनियाँ प्रस्तावअनुसार नै सरकार ‘नन डिस्क्लोजर एग्रिमेन्ट’ गर्न सहमत भएको छ । तर नेपालको विद्यमान कानुनले ‘नन डिस्क्लोजर एग्रिमेन्ट’ गर्न अनुमति दिँदैन । यसबारे पनि सरकाले औपचारिक जानकारी दिएको छैन ।
बुधवार बसेको कोभिड १९ निर्देशक समितिमा प्रधानमन्त्री ओलीले ४० लाख डोज खोप ल्याउन गृहकार्य भइरको जानकारी दिए ।खोपको पहिलो लट जुन महिनाभित्रै आउने जनाइएको छ । उनले अन्य देशहरूसँग पनि खोप खरिदका लागि प्रयास भइरहेको जानकारी दिए ।
आगामी साउनदेखि नागरिकलाई पनि खोप लगाउने प्रक्रिया सुरु गरिने प्रधानमन्त्री ओलीको भनाइ छ ।यस्तै, हिमालयन टेलिभिजनको ‘यक्ष प्रश्न’मा कुराकानी गर्दै परराष्ट्रमन्त्री रघुवीर महासेठले चीनसँग ४० लाख र अमेरिकाको जोनसन एन्ड जोनसन कम्पनीसँग ५० लाख डोज खोप किन्ने बताएका छन् ।जोनसन एन्ड जोनसन कम्पनीको ५० लाख डोज खोप विश्वबैंकमार्फत किन्न लागेकोसमेत मन्त्री महासेठले जानकारी दिए ।
सरकारले चीनसँग ४ अर्ब ५० करोडको सीमाभित्र रहेर खोप किन्ने निर्णय गरेको बताइएको छ । प्रतिडोज १० देखि १२ डलरको बीचमा मूल्य पर्ने गरी खोप खरिद गर्ने सम्झौता हुँदैछ । यसअघि चीनले अनुदानमा दिएको सिनोफर्माको ‘भेरोसेल’ खोप नै खरिद गर्न लागिएको हो ।खोप उत्पादकहरूले ९० दिनभित्र खोप उपलब्ध गराउने बताएको मन्त्री महासेठले जानकारी दिए ।
प्रकाशित मिति: बिहीबार, असार ३, २०७८
-1732776560.jpg)
