काठमाडौँ । काठमाडौँ उपत्यकाभित्र जारी निषेधाज्ञाबारे निर्णय गर्न आज तीन वटै जिल्लका प्रमुख जिल्ला अधिकारी (प्रजिअ)को बैठक बस्दै छ।
जिल्ला प्रशासन कार्यालयमा दिउँसो बस्न लागेको बैठकले हालको अवस्थालाई केही खुकुलो गर्दै एक साताका लागि अझै निषेधाज्ञा थप्ने तयारी गरेको छ । यसअघि तीन वटै जिल्लाका प्रमुख जिल्ला अधिकारीको अनौपचारिक छलफलले निषेधाज्ञा थप गर्ने सहमति गरी सकेको छ ।
उपत्यकाभित्र संक्रमणदर घटे पनि सङ्क्रमणको जोखिम उच्च नै रहेकाले थप एक साता निषेधाज्ञा गरेर हेर्ने सहमति भएको हो।यस पटक थप गरिएको निषेधाज्ञा केही क्षेत्रमा खुकुलो हुनेछ। निर्माण सामाग्री, कृषिजन्य वस्तुका पसलहरूलाईसमेत खोल्न दिने तयारी भइरहेको छ। त्यस्तै, खाद्यान्न, फलफूल, तरकारी मासुजन्य वस्तुका पसलहरूलाई समेत खोल्ने समय थप गरिनेछ।
बैङ्क तथा वित्तीय संस्था, सरकारी कार्यालय लगायत अन्य क्षेत्रमा काम गर्ने कर्मचारीको निजी सवारी साधनको आवतजावतमा समेत सहजीकरण हुने गरी निर्णय गर्ने तयारी भइसकेको छ।
कोरोना सङ्क्रमण बढेपछि रोकथाम तथा नियन्त्रण लागि भन्दै स्थानीय प्रशासन कार्यालयहरूले काठमाडौँ उपत्यकाभित्र वैशाख १६ गतेदेखि निषेधाज्ञा जारी गरेको हो। अहिले देशका ७५ वटा जिल्लामा निषेधाज्ञा जारी छ।
प्रकाशित मिति: आइतबार, जेठ ३०, २०७८
-1732776560.jpg)
