काठमाडौँ । नेपाल विश्वमा खुशी भएका देशहरुको सूचीमा ८७ औँ स्थानमा परेको छ। राष्ट्रसंघीय दिगो विकास परियोजनाले शुक्रबार सार्वजनिक गरेको विश्व खुसी रिपोर्ट (वर्ल्ड ह्याप्पिनेस रिपोर्ट–२०२१) को सूचीमा नेपाल ८७ औं स्थानमा परहेको हो।
सन् २०२० मा ९२ औँ स्थानमा रहेको नेपाल सन् २०२१ मा ५ स्थान माथि उक्लिएर ८७ औँ स्थानमा पुग्न सफल भएको छ। नेपालले १० मा ५.२६९ अंक प्राप्त गरेको छ। त्यसअघि सन् २०१९ मा नेपाल १०० औँ स्थानमा थियो।
विगत तीन वर्षमा गरिएको सर्वेक्षणका आधामा खुशी देशहरुको सूची निकालिएको हो। स्वस्थकर औसत आयु, सामाजिक सुरक्षा, सामाजिक स्वतन्त्रता र भ्रष्टाचारको अवस्थालाई अध्ययनको सूचक मानिएको छ। अध्ययनले विशेष गरेर कोरोना महामारीले जनजीविकालाई पारेको असरमा जोड दिएको थियो।
उक्त अध्ययन अनुसार नेपाल यसपटक दक्षिण एसियाकै खुशी मुलुक बन्न सफल भएको हो। नेपालको छिमेकी मुलुक भारत १३९ औँ स्थानमा, चीन ८४ औँ स्थानमा छ, पाकिस्तान १०५ औँ स्थानमा र बंगलादेश १०१ औँ स्थानमा छन्।
सूचीअनुसार विश्वकै सबैभन्दा खुशी मुलुक फिनल्यान्ड पहिलो नम्बरमा छ। फिनल्यान्डपछि क्रमशः डेनमार्क, स्वीटजरल्यान्ड, आइसल्यान्ड, नेदरल्यान्ड्स, नर्वे, स्वीडेन, लक्जेम्बर्ग, न्यूजिल्यान्ड र अष्ट्रिया छन्। उत्कृष्ट दशभित्र युरोपबाहिरबाट न्यूजिल्यान्ड मात्र अटाएको छ।
अफगानस्तान १४९ औँ स्थानमा परेको छ। सूचीमा विश्वको शक्तिशाली राष्ट्र मानिने अमेरिका १९ औँ स्थानमा छ।
यस्तो छ वर्ल्ड ह्याप्पिनेस रिपोर्ट–२०२१
प्रकाशित मिति: आइतबार, चैत ८, २०७७
-1732776560.jpg)
