काठमाडौँ । सिन्धुपाल्चोकको जुरे पहिरोबाट विस्थापन भएका पहिरो पिडितले पुनर्वासको माग गर्दै काठमाडौँको माइतीघर मण्डलामा प्रदर्शन गरेका छन् । पहिरो गएको ६ बर्षसम्म सरकारले पुनर्वासको व्यवस्था गर्न वास्ता नगरेको भन्दै पहिरो पिडितहरुले शनिबार प्रदर्शन गरेका हुन् ।
सिन्धुपाल्चोकको बलेफी गाउँपालिकाबाट आएका पहिरोपीडितहरूले आफूहरुका नाममा संकलित २ करोड २४ लाख रुपैयाँ तुरुन्त वितरण गर्न पनि सरकारसँग माग गरेका छन् । उनीहरूले पहिरो पिडितको नाममा देश विदेशबाट सहयोग स्वरुप संकलन भएको रकम पिडिसम्म नपुगेको भन्दै आक्रोस व्यक्त गरेका छन् ।
प्रदर्शनकारीले ‘हामीले सरकारी पैसा मागेका होइनौं, ६ वर्ष पहिले हामीलाई जनताले दिएको चन्दा मागेका हौं’ , जुरे पहिरो पिडितलाई तत्काल पुनस्थापना गरियोस्’ लगायत विभिन्न माग सहितको प्लेकार्ड बोकेर प्रदर्शन गर्नुका साथै नारा समेत लगाएका छन् ।
२०७१ सालमा सुनकोसी नै थुनिने गरी गएको जुरे पहिरोमा १ सय ४५ जनाको मृत्यु भएको थियो भने थुप्रै घाइते भएका थिए ।
६ वर्षअघि जुरे पहिरोपीडितका नाममा संकलित रकम अन्यत्र कतै खर्च नभए पनि पीडितका नाममा कहाँबाट कति पैसा संकलन भयो भन्ने जानकारी पनि पीडित परिवारलाई सरकारले जानकारी गराएको छैन ।
प्रकाशित मिति: शनिबार, फागुन ८, २०७७
-1732776560.jpg)
