काठमाडौँ । नेपाली पत्रकारहरूको अन्तर्राष्ट्रिय सञ्जाल (इञ्जा) द्वारा स्थापना गरिएको खोजी पत्रकारिता पुरस्कार (२०२०) नागरिक दैनिकका सम्वाददाता टपेन्द्र कार्की र लोकान्तर डटकमका समाचार सम्पादक सुशील पन्तलाई प्रदान गरिने भएको छ । एक लाख रुपैयाँ राशिको सो पुरस्कार पत्रकार कार्की र पन्तलाई सयुंक्तरुपमा प्रदान गर्न लागिएको हो ।
पत्रकार कार्कीले नेपाल प्रहरीमा लत्ताकपडा खरिदसम्वन्धमा भएको अनियमितता सम्बन्धी समाचार र पत्रकार कार्कीले कोरोना विपत्तिको समयमासमेत सांसद र उनीहरूका पीएले दशैँं भत्ता लिएका समाचारलाई प्रकाशन गरेका थिए ।
समाचार माध्यमहरूको लगातारको निगरानीपछि छानविन हुँदा नेपाल प्रहरीमा लत्ताकपडा खरिदमा अनियमितता भएको पुष्टि भएको थियो भने सांसदहरूले दशैँंभत्ता फिर्ता गर्न बाध्य भएका थिए ।
इञ्जाद्वारा गठित निर्णायक समितिले प्राप्त आवेदनहरू मध्येबाट पत्रकार कार्की र पत्रकार पन्तको समाचारलाई उत्कृष्ट ठहर गरेको थियो ।
सोलुखुम्बुमा जन्मिएका पत्रकार कार्कीले २०६० सालदेखि विभिन्न साप्ताहिक पत्रपत्रिकामा काम गर्दै २०६४ सालमा राजधानी दैनिकबाट पत्रकारितालाई थप गति दिएका थिए । उनले हाल नागरिक दैनिकमा सुरक्षा, अपराध, सुशासन र राजनीतिक बिटमा निरन्तर रिपोर्टिङ गर्दै आएका छन् ।
गुल्मीमा जन्मिएका पत्रकार पन्तले रेडियो पत्रकारिताबाट करियर सुरु गरेका हुन् र हाल उनी लोकान्तर डटकममा संसद्, सरकार, सुशासन लगायत थुप्रै विषयमा आफ्नो कलम चलाउँदै आएका छन् ।
मार्च १ मा काठमाडौँमा आयोजना हुने विशेष समारोहमा यो पुरस्कार प्रदान गरिने छ ।
इञ्जाले यसअघि उत्कृष्ट साहित्यिक कृति पुरस्कार (२०२०) साहित्यकार तथा पत्रकार राजेन्द्र पराजुलीद्वारा लिखित संस्मरणात्मक कृति कोटेश्वरको केटोलाई प्रदान गने निर्णय गरिसकेको छ भने इञ्जा सामुदायिक पत्रकारिता पुरस्कार भोलि घोषणा गरिने इञ्जाले जानकारी गराएको छ ।
प्रकाशित मिति: सोमबार, फागुन ३, २०७७
-1732776560.jpg)
