काठमाडौँ । सरकारले कोरोना नियन्त्रण र उपचारका नाममा १० अर्ब रुपैयाँ सकिएको विवरण सार्वजनिक गरेको पनि १ महिना पुग्न लागिसकेको छ । पछिल्लो विवरण सरकारसँग माग्ने हो यो अंकले निकै उकालो चढिसकेको अनुमान गर्न सकिन्छ ।
क्वारेन्टाइमा बसेका १ युवा राजु सदाले जीवनजल खान नपाएर मृत्यु वरण गरेको पछिल्लो घटनाबाटै स्पष्ट भइरहेको छ, सरकारले कोरोना नियन्त्रणका नाममा भनेर देखाएको खर्च विवरण कहाँ गयो भन्ने कुरा । भेडा बाख्राको खोरभन्दा तल्लो स्तरका क्वारेन्टाइनहरुलाई आलोचकहरुले डेथ चेम्बरको संज्ञा दिएका छन् ।
यसबीचमा न कुनै नयाँ अस्पताल निर्माण भएको छ, न भेन्टिलेटरको संख्या बढाइएको छ न आइसोलेसनको व्यवस्था गरिएका छ । अनि व्यवस्था गरिएका भनिएका क्वारेन्टाइनको अवस्था पनि सबैले देखेकै छन् । यस्तो अस्तव्यस्तताबीच अपत्यारिलो रकम खर्च भएको विवरण सार्वजनिक गरेपछि काठमाडौँमा निरन्तर विरोध प्रदर्शन भइरहेका छन् ।
सरकार न खर्च विवरणको तथ्यगत आधार दिन्छ न आलोचना गर्नेहरुको आवाज नै सुन्न चाहन्छ । बरु सरकारले रोकथामका लागि आवश्यक काम गरिरहेको दाबी मिथ्या सावित गर्दै दिनानुदिन संक्रमितहरुको संख्या बढिरहेको छ । दैनिक सरदर ५ सयको संख्यामा कोरोना संक्रमित बढिरहेको तथ्यांक स्वास्थ्य मन्त्रालयले सार्वजनिक गरिरहेको छ ।
यस्तो असहजताका बीच प्रधानमन्त्री केपी शर्मा ओली भने बेसार पानी खान र हाछ्युँ गरेर कोरोना भगाउन सरकारका तर्फबाट राष्ट्रिय सन्देश सार्वजनिक गर्छन्, त्यो पनि संसदमार्फत ।
कोरोना रोकथाममा सरकारको हेल्चेक्र्याइँ देखेर निराश भएका आम जनताका लागि सिन्धुपाल्चोकबाट भने सकारात्मक सन्देश प्रवाह भएको छ । सरकारको गैरजिम्मेवारीपनले कोरोना महामारीबाट जनताको जीवन रक्षा गर्न नसकिने भन्दै नेपाली कांग्रेसका नेता तथा पूर्वमन्त्री मोहनबहादुर बस्नेतले आफ्नै पहलबाट गृहजिल्ला सिन्धुपाल्चोकमा पिसिआर मेसिन जडान गर्ने घोषणा गरेका हुन् । सिन्धुपाल्चोक जिल्लाको बाह्रबिसेस्थित अस्पतालमा पिसिआर प्रविधिको अत्याधुनिक उपकरण व्यवस्था गर्न लागिएको बस्नेतद्वारा जारी विज्ञप्तिमा उल्लेख गरिएको छ ।
निजी स्तरबाट यसरी आफ्नै पहलमा पिसिआर मेसिन व्यवस्था गरी कोरोनाको चेकजाँच गर्न लागिएको सम्भवतः यो पहिलो घटना हो । गृह जिल्लाको विकास र त्यहाँका जनताका लागि सधैँ अभिभावकको भूमिका खेलिरहेका बस्नेतले सरकारको निरीहतालाई टुलुुटुलु हेरेर बस्ने अवस्था नरहेकाले आफ्नो पहलमा यो व्यवस्था गर्न लागिएको आजको न्युजलाई प्रतिक्रिया दिए ।
बस्नेतका अनुसार आफूले खरिद गर्ने नभई संयोजन गर्ने र सहयोगी हातहरुले मेसिन खरिदमा सहकार्य गर्ने छन् । यसरी खरिद गरिने पिसिआर मेसिन सञ्चालन र परीक्षणका लागि पनि दक्ष जनशक्ति व्यवस्थापन गर्न लागिएको बस्नेतद्वारा जारी विज्ञप्तिमा जनाइएको छ । पिसिआर मेसिन खरिद, जडान र सञ्चालनमा झण्डै सवा करोड रुपैयाँ लाग्ने अनुमान गरिएको छ ।
पिसिआर मेसिनको जडान सम्पन्न भएपश्चात सिन्धुपाल्चोक जिल्लामा कोरोना परीक्षण गर्न चाहने सबै सर्वसाधारणका लागि यो सेवा निःशुल्क उपलब्ध गराइने बस्नेतले बताएका छन्् । सिन्धुपाल्चोकका अलावा सम्भव भएसम्म रामेछाप, दोलखा लगायत त्यस क्षेत्रका जोकोही सर्वसाधारणले परीक्षण गर्न पाउने छन् ।
बेसार पानी खानु, हाछ्युँ गर्नु, कोरोना फाल्नु र घरमा बस्नु भन्ने सरकारी मिथ्याले कोरोना रोगको नियन्त्रण र रोकथाम नहुने देखेर जनस्तरबाटै यस्तो पहल गर्न लागिएको बस्नेतद्वारा जारी विज्ञप्तिमा उल्लेख गरिएको छ ।
यसअघि पनि बस्नेतकै पहलकदमीमा सिन्धुपाल्चोकमा स्वास्थ्यकर्मी, सुरक्षाकर्मी र आम नागरिकलाई भन्दै जिल्लामा पटकपटक स्वास्थ्य सामग्री वितरण गरिएको थियो । सरकारका तर्फबाट कुनै पहल नै नभएका बखत स्वास्थ्य सामग्री वितरणमा सक्रिय रहेका बस्नेतले जिल्लामा कार्यरत सम्पूर्ण स्वास्थ्यकर्मीको कोरोना बिमा गराएर अर्को जनप्रिय काम गरेका थिए । उनको पहलमा जिल्लाका ६१३ जना स्वास्थ्यकर्मीको कोरोना बिमा गरिएको थियो । यसबाट जिल्लामा कार्यरत स्वास्थ्यकर्मीहरु उत्साहित रुपमा जनताको सेवामा लागिरहेको स्थानीयले अनुभव गरेका छन् ।
त्यस्तै कोरोनाबाट मृत्यु भएकी एक महिलाको परिवारलाई राहत उपलब्ध गराउनुका साथै उनको शिशुको सम्पूर्ण शिक्षादीक्षाको जिम्मेवारी लिएको पनि बस्नेतले यसअघि नै घोषणा गरेका थिए ।
विकासप्रेमी नेताको छवि बनाएका बस्नेतले यसअघि स्वास्थ्य राज्यमन्त्री र सञ्चारमन्त्रीको भूमिका निर्वाह गरिसकेका छन् । गएको चुनावमा वर्तमान सभामुख अग्नि सापकोटासँग पराजित भए पनि जिल्लाको विकास निर्माण र जनताको सारोगाह्रोमा सधैँ अग्रपंक्तिमा बस्नेतनै रहने गरेको जिल्लाबासीको अनुभव छ ।
संकटसँग जुधिरहेका जनताका लागि गरिएका बस्नेतका पछिल्ला घोषणाले उनको लोकप्रियता समेत चुलिएको छ । उनको बढ्दो लोकप्रियता रोक्न सरकारले उनले गरिरहेका सामाजिक काममा पटकपटक अवरोध पनि सिर्जना गरिरहेको छ ।
प्रकाशित मिति: सोमबार, असार १५, २०७७
-1732776560.jpg)
