दैलेख । कोरोना संक्रमितको संख्या तीब्र बन्दै गएपछि यहाँका जनप्रतिनिधि र राजनीतिक दलले संक्रमण रोकथाम र नियन्त्रणका लागि तत्काल प्रभावकारी कदम चाल्न प्रदेश र केन्द्र सरकारसँग आग्रह गरेका छन्।
भारतबाट फर्किएकाहरूमा कोभिड-१९ पोजिटिभ बढ्दो रूपमा देखिइरहेको छ। तर, उनीहरूको व्यवस्थापन र उपचारमा ध्यान नदिँदा कोराना संक्रमण समुदायस्तरसम्म फैलिनसक्ने खतरा बढ्दै गएको छ ।
नगरभित्रका ११३ जनामा एकैपटक संक्रमण भएपछि चिन्ता थपिएको हो। हिजो, २४ जेठमा दुल्लु नगरपालिकामा २६ र महाबु गाउँपालिकामा पाँच महीने बालिका र १८ महीने बालकसहित १०७ जनामा संक्रमण देखिएपछि अहिले दैलेखमा कूल संक्रमित ३५२ पुगेको छ।
एकजनाको क्वारेन्टाइनमै मृत्यु भएको छ भने एकजना कोरोनामुक्त भएर घर फर्किसकेका छन्। २२ जेठमा संक्रमण पुष्टि भएका ११३ मध्ये ८७ जना गाउँमै छन् । उनीहरुको स्वास्थ्य अवस्था हेरेर आइसोलेसन अस्पतालमा ल्याउनेबारे छलफल चलिरहेको छ ।
जिल्ला सुरक्षा समितिले नारायण नगरपालिकाका विभिन्न क्वारेन्टाइनमा बसेकालाई एक साता कटेपछि पिसीआर परीक्षण गर्न स्वाब संकलन गरेर सुर्खेत पठाएको थियो। नतिजा आउन ढिलाइ भएपछि उक्त स्वाब जुम्ला गयो। जुम्लाबाट धेरैको शङ्कास्पद छ भनियो तर पुष्टि गरिएन।
रिपोर्ट आउन ढीला भएपछि पुनः आरडिटी परीक्षण गरेर नेगेटिभ रिपोर्ट आएका जतिलाई घर पठायो। घर पुगेको तीन दिनपछि रिपोर्ट आउँदा नगरभित्रका ११३ जनामा कोभिड-१९ देखियो।
तर, क-कसको नाम हो भनेर बिहीबार २२ जेठ साँझसम्म आएन। अहिले दैलेखको नारायण नगरपालिकाका विभिन्न वडामा ८७ संक्रमित घरमै बसेका छन्।
स्वास्थ्य समस्या केही नभएको भन्दै उनीहरुलाई घरमै सुरक्षित राख्नेतर्फ जिल्ला सुरक्षा समिति र स्वास्थ्य कार्यालय दैलेख लागेको छ ।
जिल्ला समन्वय समिति दैलेखका प्रमुख प्रेम थापाले यस्तो महामारी रोगलाई पनि सामान्यरूपमा हेरिनुले जनताको स्वास्थ्यमा खेलबाड भएको भन्दै आलोचना गरे।
“भारतबाट ४२ हजार आउने अनुमान छ। अहिले १२ हजार आइसकेका छन्। यही तथ्याङ्कलाई आधार मान्ने हो भने दैलेखमा धेरैमा सङ्क्रमण देखिन सक्ने जोखिम बढेको छ। हामीले बारम्बार सरकारलाई यो कुरा जानकारी गराएका छौँ।” अवस्था भयावह भएको सुन्नुभन्दा सरकारले अहिले नै ध्यान दिनुपर्ने थापाले बताए।
अहिले कुन वडामा कति जना सङ्क्रमित पुगेका हुन्, क–कसलाई भेटे भन्नेबारेमा कन्ट्याक्ट ट्रेसिङ गर्न चुनौति थपिएको छ।
जिल्ला स्वास्थ्य कार्यालय दैलेखका प्रमुख डा. निरञ्जन पन्त संक्रमितलाई कुनै पनि लक्षण नदेखिएको अवस्थामा घरमै सुरक्षित बस्न र फोनबाट स्वास्थ्यकर्मीले उनीहरूको अवस्था बुझ्ने काम भएको बताउँछन्।
स्वास्थ्य मन्त्रालयले पनि लक्षण नदिएका र स्वास्थ्य समस्या नभएकाहरुलाई घरमै बस्ने गरी निर्देशिका जारी गरेर पठाएकाले यो विषयमा जिल्लामा छलफल भइरहेको पन्तले बताए। रासस
प्रकाशित मिति: आइतबार, जेठ २५, २०७७
-1732776560.jpg)
