२७ वैशाख, दाेलखा । दोलखा जिल्लाको गौरीशंकर गाउँपालिका वडा नं २ जुँगु रेशमडाँडामा नेकपा माओवादी केन्द्रका नेताको उपस्थितिमा एमाले कार्यकर्ता कुलबहादुर तामाङलाई भाला रोपेर, खुकुरीले काट्दै कुटीकुटी मारेको घटनाले पुनः सशस्त्र द्वन्दको पुनरावृत्ति गराएको छ । बैशाख २६ गते बेलुकी जँुगुको नीलकण्ठेश्वर मावि छेउको खाजा घरमा नेकपा एमालेका १५/१६ जना कार्यकर्ता दिनभरको चुनावी प्रचारको विश्लेषण गर्न बसीरहेका बेला आक्रमण गरिएको थियो ।
देवी खड्काको नेतृत्वमा हत्या !
नेकपा माओवादी केन्द्रकी पोलिटब्यूरो सदस्य एवं दोलखा इन्चार्ज पूर्वराज्यमन्त्री देवी खड्काको नेतृत्वमा ५०/६० जना जिल्ला बाहिरबाट भाडामा ल्याईएका गुण्डाको साथमा केही स्थानीय माओवादी कार्यकर्ताहरु सहित हवाई फायरिङ गर्दै पुरै गाउँ त्रसित बनाईएको थियो । १७ राउण्ड हवाई फायरिङ गरिसकेपछि लछुमन जिरेलको उक्त होटलमा खाना अर्डर गरेर बसेका केही एमाले कार्यकर्ता सुरक्षित स्थान खोज्दै निस्के र केही भने ढोका बन्द गरेर त्यहीँ भित्र बसे । माओवादीले घरको चारैतिरबाट भित्र पस्न खोज्दा कतैबाट नसकेपछि छानामा ढुंगामुढा प्रहार गर्दै घरको छानाको जस्ता खोलेर भित्र पसे । नेकपा एमालेका उम्मेदवार गोरे ब तामाङको छोरा कुल बहादुर तामाङलाई भित्रैबाट कुटपीट गर्दै बाहिर चौरमा ल्याएर गर्धनमा भाला रोप्दै खुकुरी र छुरीले शरीरभरी प्रहार गर्दै कुटीकुटी बेहोस पारी डिलबाट फ्याँकिदिए । त्यसपछि नेकपा एमालेका पूर्व गाविस सचिव स्थानीय शिक्षक दिल बहादुर बूढाथोकीलाई घरभित्रैबाट पिट्दै बाहिर तानेर कुल बहादुरलाई जस्तै शैलीमा पिटेर बेहोस बनाएर डाँडाबाट फ्याँकिदिए ।
प्रहरीको भूमिका शंकास्पद
घाईतेहरुले वरपर गाउँका मानिसलाई गुहार माग्दै कराउँदा पनि माओवादी नेताहरुले कसैलाई छिर्न दिएनन । माओवादी केन्द्रका केन्द्रीयस्तरका नेता देवी खड्का, विशाल खड्का, गंगा कार्की (विश्व) लगायत गणेश कार्की, बिर्खबहादुर खड्का, वसन्त कार्की, दलबहादुर कार्की, बलराम खड्का, भरत खड्का, रोशन कार्की, ढालबहादुर खड्का, विश्वास कार्की सहितको उपस्थितिमा घटनास्थलमा कसैलाई छिर्न नदिई बर्बरतापूर्ण ढंगले आक्रमण गरिएको एमाले केन्द्रीय सदस्य पार्वत गुरुङले बताएका छन । घटना भएको थाहा पाएपनि दोलखाको प्रहरी प्रशासन निकै ढिला पुगेको थियो । घटनास्थलमा घाईतेहरुको पत्तो नलागेपछि प्रहरीले पार्वत गुरुङलाई पुन सम्पर्क गरी के गरौँ ? भनी सोधेको थियो । गुरुङले विद्यालयको हाता वरिपरी र भीरतिर नै हुनसक्ने बताएपछि प्रहरीले भीरमा खोज्दा दुवै घाइतेलाई फेला पारेका थिए । उद्धार कार्य धेरै ढिला भएकाले ३५ बर्षीय युवा कुल बहादुर तामाङको चरिकोट ल्याउँदै गर्दा बाटोमा मृत्यु भयो भने दिल बहादुर बूढाथोकीलाई चरिकोटमा सामान्य उपचार पछि काठमाण्डौँ पठाईएको छ ।
कानुनी उपचार खोज्ने एमालेको तयारी
घटनाका बिषयमा नेकपा एमाले दोलखाले यो अत्यन्तै नीन्दनीय र दुखद हत्या भएको साथै हत्याराहरुलाई कानुनी कठघरामा उभ्याएरै छाड्ने जनाएको छ । स्थानीय तहको निर्वाचनमा आफ्नोपक्षमा जनलहर नदेखेपछि माओवादीले जनतालाई तर्साउन ब्यक्तिहत्या सुरु गरेको एमाले नेता पूर्वमन्त्री आनन्द पोखरेल बताउँछन् र उनी भन्छन माओवादी जनताबाट बहिष्कृत भैसकेको पार्टी हो र माओवादीको यस्तो कुकृत्यदेखि एमाले दोलखा डराउदैन अभैm जनताको पक्षमा सशक्त भएर लागिरहन्छ । यो घटनाको बिषयमा कानुनी बाटोबाट अघि बढ्ने एमालेको तयारी छ । घटनाको बिषयमा माओवादी दोलखाले खासै प्रतिक्रिया जनाएको छैन । एकाथरीले एमाले आफैँबीचको झडपको परिणाम हो भनेका छन् भने अर्काथरीले एमालेको आक्रमणको प्रतिवाद गर्दा यस्तो भएको हो भन्ने जस्ता अपत्यारिला अभिब्यक्तिहरु दिईरहेका छन् । घटनाकै बिषयमा दोलखा प्रहरी छानबिन पछि मात्रै बोल्नेगरी चुप बसेको छ तर घटनास्थलबाट तीन जनालाई पक्राउ गरेको बुझिन आएको छ ।
हत्यामा कांग्रेसको पनि समर्थन !
घटनास्थल गौरीशंकर गाउँपालिका एमाले केन्द्रीय सदस्य पार्वत गुरुङ, माओवादी पोलिटब्यूरो सदस्य देवी खड्का र कांग्रेस जिल्ला सभापति रुद्र ब. खड्काको जन्मस्थल रहेको छ । जँुगुमा सशस्त्र द्वन्द पछि पनि कुनैपनि निर्वाचनमा जनताले स्वतन्त्र ढंगबाट मतदान गर्न पाएका छैनन तर यस पटको निर्वाचनमा यही क्षेत्रका सांसद पार्वत गुरुङले सबै जनतालाई स्वतन्त्र ढंगले मतदान गराउने अभिब्यक्ति दिँदै आएका छन् तर माओवादीको यो ब्यवहार हेर्दा चुनाव पहिलेजस्तै करबलमा गराउन खोजेको जस्तो बुझिन्छ । निर्वाचनमा दोलखामा माओवादी, कांग्रेसले तालमेल गरेको छ त्यसैले नेपाली कांग्रेसले पनि हत्याको समर्थन गरिरहेको देखिन्छ ।
प्रकाशित मिति: मंगलबार, वैशाख २६, २०७४
