८ वैशाख, काठमाडौँ । नेपाल प्रहरीका डिआइजी नवराज सिलवाल माथि किर्ते अभियोगमा सरकारले अनुसन्धान सुरु गरेको छ । डिआइजी जयबहादुर चन्दलाई सरकारले नेपाल प्रहरीको प्रमुखमा नियुक्त गरे लगत्तै सर्वोच्च अदालतको ढोका ढकढकाउन पुगेका सिलवालले सर्वोच्च अदालतमा बुझाएको कार्यसम्पादन मूल्यांकन प्रतिवेदनको प्रतिलिपि किर्ते रहेको खुलेपछि सरकारले अनुसन्धान सुरु गरेको हो । बिहीबार बसेको मन्त्रिपरिषद् बैठकले निर्णय नै गरेर सिलवालमाथि अनुसन्धानको प्रक्रिया अघि बढाएको हो । यसअघि पनि मिटर व्याज सञ्चालक भनेर अभियोग खेपेका सिलवालले किर्ते गरेको प्रमाणित भए उनी कारबाहीको भागिदार हुनेछन । महान्यायधिवक्ताको कार्यालयले सिलवालमाथि अनुसन्धान सुरु भएको पुष्टि गरेको छ । सिलवाल अहिले नेपाल प्रहरीको केन्द्रीय अनुसन्धान व्यूरोको प्रमुखको रुपमा कार्यरत छन । सरकारले दोस्रो पटकको निर्णयमा प्रकाश अर्याललाई आइजिपीमा नियुक्त गरेपछि सरकारले आफू माथि अन्याय गरेको भन्दै सिलवाल पुनः सर्वोच्च पुगेका छन ।
प्रकाशित मिति: बुधबार, वैशाख ६, २०७४
