भारतीय प्रधानमन्त्री नरेन्द्र मोदी वाराणसीमा आफूलाई ‘गंगाको पुत्र’ बताउँछन् । तर जब काँग्रेस महासचिव प्रियंका गान्धी फूलपुर जान्छिन्, तब उनको स्वागत ‘गंगाकी छोरी’ भनेर बोलाइन्छ ।
दुवै एक अर्कालाई चुनावी र्यालीमा आरोप प्रत्यारोप गरिरहेका थिए । जसबाट दुई जना एक अर्काविरुद्ध चुनावी मैदानमा भिड्ने अनुमान गरिएको थियो । तर बिहीबार काँग्रेसले वाराणासीका लागि आफ्ना उम्मेदवारको नाम घोषणा गरेपछि यो सबैको अनुमान फेल खायो ।
काँग्रेसले नरेन्द्र मोदीकाविरुद्ध प्रियंका गान्धीको साटो स्थानीय नेता तथा पूर्वविधायक अजय रायलाई उतार्ने निर्णय गरेको छ । पार्टीका कार्यकर्ता पनि प्रियंका गान्धी बनारसमा मोदीविरुद्ध चुनाव लडुन भन्ने चाहन्थे ।
प्रियंका आफैंले पनि यी विषयलाई खुलेर कहिल्यै प्रतिवाद गरेकी थिइनन् । केही दिनपहिले पत्रकारले बनारसबाट चुनाव लड्ने विषयमा सोधेको प्रश्नको उत्तर दिँदै उनले यदि पार्टीले आफूलाई टिकट दिएमा चुनाव लड्ने बताएकी थिइन् ।
आफ्नो चुनावी यात्राका क्रममा उनले बनारसको समेत भ्रमण गरेकी थिइन्, जहाँ उनको भव्य स्वागत भएको थियो । तर पार्टीले उनलाई बनारसबाट चुनावी मैदानमा उतारेन । यसका पछि के कारण हुनसक्छ ?
जवाफमा वरिष्ठ पत्रकार नवीन जोशी भन्छन्, ‘प्रियंकालाई मैदानमा उतार्ने विषय सनसनी मच्चाउनका लागि मात्रै थियो । कुनै गम्भीर प्रश्न थिएन, यसबारेमा यसअघि नै थाहा पाउन जरुरी थियो ।’
उनी भन्छन्, ‘यदि प्रियंका गान्धी आफ्नो चुनावी राजनीतिको सुरुवात गर्न चाहन्छिन् भने मोदीसँग लडेर सुरु गर्न चाँहदिनन् किनकी केही सम्भावनाबीच पनि उनले चुनाव जित्ने अनुमान गर्न सकिदैन ।’
उनले प्रियंका चुनाव लडेपनि रायबरेली या अन्य सिटबाट लड्नसक्ने बताए । सुरुवातमा रायबरेलीबाट लड्ने कुरा पनि आएको थियो । यहाँबाट उनलाई बनारसबाट भन्दा संसदमा जाने बाटो सजिलो पर्न सक्छ ।
पूर्वीउत्तर प्रदेशमा लोकसभाका २९ सिट छन् । जसमध्ये २७ स्थानमा भाजपाले चुनाव जित्ने सम्भावना छ । यसमध्ये वाराणसीपनि सामेल छ । जहाँबाट प्रधानमन्त्री मोदी पनि सांसद छन् ।
मोदीको विरोधबाट सुरुवात
आम निर्वाचनभन्दा ठीक अघि २३ जनवरीमा प्रियंका गान्धी राजनीतिमा सक्रिय रुपमा आइन् । उनलाई पार्टीको महासचिव पद दिइएको छ र पूर्वीउत्तरको जिम्मेवारी दिइएको छ ।
सक्रिय राजनीतिमा आएपछि प्रियंकाले आफ्नो पहिलो भाषण पनि मोदीको गढ गुजरातमा गरेकी थिइन् । यो भाषणमा उनले मोदीमाथि नै आरोपको वर्षा गरेकी थिइन् ।
उनको सुरुवात नरेन्द्र मोदीको विरोधबाट भयो र फेरि पार्टी उनलाई चुनावमा उतार्न किन चाँहदैन भन्ने बारेमा वरिष्ठ पत्रकार जतिन गान्धी भन्छन्, ‘भाषण र बयान दिनु अलग कुरा हो, चुनाव लड्नु अलग हो । चुनावका लागि आधारभूत स्तरमा कार्यकर्ताको आवश्यकता पर्छ । बनारसमा काँग्रेसको त्यति सशक्त अवस्था छैन ।’
जतिन गान्धी प्रियंकालाई मैदान नउतार्नुको अर्को कारण सपा–बसपा बीच भएको गठबन्धनलाई पनि मान्छन् । उनी भन्छन्, ‘सोमबार नै समाजवादी पार्टीले शालिनी यादवलाई त्यहाँबाट चुनाव लडाउने निर्णय गरेपछि यो स्पष्ट भएको थियो ।’
यसअघि महागठबन्धनका तर्फबाट कोही प्रत्यासी नउठ्ने बताइएको थियो । तर अब उसका तर्फबाट काँग्रेसले अब सो स्थानलाई खाली नछाड्ने भएको छ ।
प्रियंका आएपछि गणित फेरियो ?
बनारसबाट काँग्रेसले अजय रायलाई मैदानमा उतारेको छ । महागठबन्धनबाट समाजवादी पार्टीका उम्मेदवार शालिनी यादव मैदानमा छिन् । २०१४ को लोकसभा निर्वाचनमा काँग्रेस, सपा र बसपासँगै आम आदमी पार्टीका नेता अरविन्द केजरीवाल पनि नरेन्द्र मोदीलाई सो सिटबाट चुनौती दिन उभिएका थिए ।
मोदीले करिब ५ लाख ८० हजार भोट ल्याएर जितेका थिए भने केजरीवालले करिब २ लाख मत ल्याए र तेस्रो नम्बरमा काँग्रेसका अजय रायले ७५ हजार भोट पाएका थिए । के यो गणित प्रियंका गान्धी मैदानमा आएपछि फेरिन सक्छ ? वरिष्ठ पत्रकार नवीन जोशी भन्छन्, ‘प्रियंकालाई यदि वाराणसीबाट उम्मेदवार बनेको भएमा काँग्रेसलाई निश्चित रुपमा फाइदा हुन्थ्यो । तर उनले जित्न सक्ने अवस्था छैन ।
प्रियंकाको असर बनारसका आसपासका इलाका, जौनपुर, मउ र आजमगढ वगैरह सिटमा पनि निश्चित रुपमा पर्ने थियो । तर सानो फाइदाका लागि काँग्रेसले प्रियंका गान्धीको रुपमा ठूलो मूल्य चुकाउन चाहेन । काँग्रेस आफ्ना भविष्यका नेताको सुरुवात हारबाट होस् भन्ने चाँहदैन ।
प्रकाशित मिति: शुक्रबार, वैशाख १३, २०७६
-1732776560.jpg)
