१० कात्तिक, झापा । बालकको मृत्यु प्रकरणबारे छानविन गर्न माग गर्दै गरिएको प्रदर्शनमा प्रहरीले गोली चलाउँदा दुई जनाको मृत्यु भएको छ । मृत्यु हुनेमा अर्जुनधारा नगरपालिका ११ का नरेश थापा रहेका छन अर्का एक जनाको पहिचान नखुलेको प्रहरीले जनाएको छ । विर्तामोडस्थित इलाका प्रहरी कार्यालय अगाडि प्रदर्शन गरिरहेको समूहमाथि प्रहरीको गोली चलाएको हो । प्रहरीले १४ राउण्ड गोली चलाएको थियो भने त्यसबाट १ जनाको मृत्यु र ७ जना घाइते छन् । घाइतेको स्थानीय अस्पतालमा उपचार भइरहेको छ । प्रहरीले गोली हानी प्रदर्शनकारीको हत्या गरेपछि उत्पन्न असहज परिस्थिति नियन्त्रणमा लिन झापाको बिर्तामोडमा अनिश्चितकालीन कफ्र्यु जारी गरेको छ । जिल्ला प्रशासन कार्यालय झापाले मुक्तिचोकको आसपास दुई किलोमिटर क्षेत्रमा अनिश्चितकालीन कर्फ्यू जारी गरेको हो । पूर्वतर्फ बिर्तामोड बसपार्क छिर्ने बाटो, पश्चिममा चारपाने, उत्तरमा महानन्द चोक र दक्षिण तर्फ बिर्ता बजारलाई निषेधित क्षेत्र घोषणा गर्दै अर्को आदेश नभएसम्मका लागि कर्फ्यू जारी गरिएको जिल्ला प्रशासन कार्यालय झापाले जनाएको छ । अर्जुनधारा नगरपालिका ११ का ११ वर्षीय लक्ष्मण शिवाकोटीको हत्यारालाई कारवाहीको माग गर्दै बिर्तामोडमा प्रदर्शन भएको थियो । गत असोज १४ गते विदेशबाट बुवाले पठाइदिएको जुत्ता लिन बिर्तामोड–५, पाथीभरा टोलमा रहेको सुरेश पोखरेलको घर गएका लक्ष्मणको शव हत्या गरेर फालिएको अवस्थामा चारपानेको ठाकुर मन्दिरदेखि २ सय मिटर पूर्वको खाडीमा १५ गते भेटिएको थियो ।
प्रकाशित मिति: बिहीबार, कात्तिक ९, २०७४
-1732776560.jpg)
