झापा : प्रधानमन्त्री केपी शर्मा ओलीले शहीदको सपना पूरा गर्न पार्टी एकता गरिएको बताएका छन् ।
४६औँ सुखानी स्मृति दिवसको अवसरमा आज झापामा आयोजित कार्यक्रममा प्रधानमन्त्री ओलीले सो कुरा बताएका हुन् ।
प्रधानमन्त्री ओलीले २०२९ सालमा जनताका हक अधिकारको माग गर्ने युवाहरूलाई जेल सार्ने बहानामा सुखानीमा ल्याएर गोली हानेर मारिएको प्रधानमन्त्री ओलीले स्मरण गरे । ‘म भागेर बचेँ नत्र त्यति बेला म पनि मारिन सक्थेँ’, प्रधानमन्त्री ओलीले भने, ‘हामीले त्यसबेला पञ्चायतको अन्त्य र गणतन्त्र स्थापनाको माग उठाएका थियौँ ।’
प्रधानमन्त्री ओलीले झापा आन्दोलनले उठाएका र पूरा हुन बाँकी रहेका मागहरू त्यसपछिका कम्युनिष्ट आन्दोलनले पूरा गरेको बताए । ‘झापा आन्दोलनका शहीद मात्र होइन, गणतन्त्रका लागि लडेका सबै शहीदहरूको योगदान महत्त्वपूर्ण छ’, प्रधानमन्त्री ओलीले भने, ‘म यही शहीद भूमिबाट भन्न चाहन्छु, तत्कालीन नेकपा (एमाले) र नेकपा (माओवादी)को पार्टी एकता पनि शहीदका सपना पूरा गर्नका लागि भएको हो ।’
प्रधानमन्त्री ओलीले लुटपाट गर्ने, चन्दा उठाउने धन्दा गर्ने समूहलाई कम्युनिष्ट भन्न नसकिने बताए । ‘जनतालाई चक्कु देखाएर कम्युनिष्ट पार्टीको नाम लिने काम बन्द गर्नुहोस्’, प्रधानमन्त्री ओलीले भने, ‘म यो शहीद भूमिबाट फेरि एक पटक आह्वान गर्छु, कोही वास्तविक कम्युनिष्ट हुनुहुन्छ भने नेकपामा आएर समाहित हुनुहोस् ।’
प्रधानमन्त्री ओलीले सरकारले देशैभर विकासको माहोल ल्याएको पनि बताए । ‘केही तत्त्वहरूले जनता भाँड्न सरकारले केही गरेन भने पनि सरकार विकास, निर्माण, सुशासनमा जिम्मेवारीपूर्वक लागिपरेको हो ।’
२०२९ फागुन २१ गते झापबाट इलाम जेल सार्ने बहानामा रामनाथ दाहाल, नेत्र घिमिरे, कृष्ण कुइँकेल, वीरेन राजवंसी र नारायण श्रेष्ठलाई सुखानीको जंगलमा गोली हानी हत्या गरिएको थियो ।
यसरी नै नेपाल कम्युनिष्ट पार्टीका अध्यक्ष एवम पुर्वप्रधानमन्त्री पुष्पकमल दाहाल ‘प्रचण्ड’ले दुई अलग अलग धारका ठूला कम्युनिष्ट पार्टीहरू एकै ठाउँमा आउने अवस्था मुलुकको समृद्धिका लागि भएको बताएका छन् ।
४६औँ सुखानी शहीद स्मृति दिवस तथा श्रद्धाञ्जलिसभालाई सम्बोधन गर्दै अध्यक्ष प्रचण्डले झापा विद्रोह र १० वर्षे जनयुद्धलाई जोडेर मुलुक अगाडि बढाउने काम पार्टी एकता भएपछि साकारको भएको बताए । फागुन १ र २१ लाई जोड्ने संकल्पको अर्थ भर्खरै मात्रै सार्थक भएको उनको भनाइ थियो । संविधान निर्माणमा आफ्नो महत्त्वपूर्ण योगदान रहेको बताउँदै उनले तत्कालीन समयमा प्रमुख प्रतिपक्षी भए पनि सो भूमिका नखेलेको भए दोस्रो संविधानसभासमेत असफल हुने खतरा रहेको खुलासा गरे ।
एकताबद्धका हुन नदिनका लागि अनेक षड्यन्त्र भए पनि केही दिनभित्र नै तल्लो तहसम्मको एकताले सकारात्मक सन्देश दिने उनको भनाइ थियो । प्रतिक्रियावादीहरूले दुई अध्यक्षबीच फाटो ल्याउन षड्यन्त्र भएकाले एक वर्षे अवधिमा समीक्षा गरेर अगाडि बढेको भन्दै अध्यक्ष प्रचण्डले कुनै पद र प्रतिष्ठाका लागि नभई मुलुकको हितका लागि समयको मागअनुसार पार्टी एकता भएको बताए ।
प्रकाशित मिति: बुधबार, फागुन २२, २०७५
-1732776560.jpg)
