काभ्रेपलाञ्चोक । बनेपाको चारदोबाटोमा ट्रिपरको ठक्करबाट एक जनाको मृत्यु भएको छ । मृत्यु हुनेमा नमोबुद्ध नगरपालिका–४ खनालथोकका ४८ बर्षीय जीतबहादुर तामाङ रहेका छन् ।
काठमाडौंबाट धुलिखेलतर्फ जाँदै गरेको बा २ क ३९३४ नम्बरको ट्रिपरले बा ८३ प ५०७७ नं को मोटरसाइकललाई पछाडिबाट ठक्कर दिँदा दुर्घटना भएको हो । घटनाका प्रत्यक्षदर्शीहरुले ठक्करबाट सामान्य घाइते भएको अवस्थामा ट्रिपर चालकले नियोजित रुपमा पुनः किचेर मारेको बताएका छन् ।
घटनलगत्तै स्थानीयवासीहरुले ट्रिपर चालकलाई बाहिर निकालेर कुटपिट गर्नुका साथै ट्रिपरमा आगो लगाइदिएका छन् । अहिले बनेपा बजारमा तनाव बढेको छ ।
ट्रिपर चालक नुवाकोट जिल्लाको बिदुर –१, का २९ वर्षीय सुधन श्रेष्ठलाई प्रहरीले नियन्त्रणमा लिएको छ ।
प्रकाशित मिति: आइतबार, साउन ६, २०७५
-1732776560.jpg)
