काठमाडौं । विगत २० दिनदेखि जुम्लामा आमरण अनशनमा रहेका डा. गोविन्द केसीलाई सेनाको हेलिकप्टरमा काठमाडौं ल्याइएको छ । केसीको स्वास्थ्य स्थिति बिग्रदै गएपछि उनको उपचारका लागि काठमाडौं ल्याउन भन्दै सरकारले हेलिकप्टर जुम्ला पठाएको हो ।
केसीलाई ल्याउनुअघि कर्णाली स्वास्थ्य विज्ञान प्रतिष्ठान बिहीबार दिनभर तनावग्रस्त बन्यो । प्रदर्शनकारीहरुको भीड नियन्त्रण गर्ने क्रममा एक जना प्रहरी घाइते भएका छन् । प्रहरीद्धारा गरिएको लाठीचार्ज र अश्रुग्याँस प्रहारबाट अस्पताल क्षेत्रमा तनाव बढेको थियो ।
तनावको स्थिति देखेपछि डाक्टर केसी काठमाडौं जान राजी भएको बताइएको छ । यसअघि केसीले सेनाको हेलिकप्टरमा नजाने बताएका थिए । पत्रकार सम्मेलनमा बोल्दै केसीले अस्पतालमा आफ्ना समर्थकमाथि प्रहरीले बल प्रयोग गरेको भन्दै त्यसलाई रोक्न आफू काठमाडौं जान तयार भएको र आफ्नो सत्याग्रह जहाँ भए पनि जारी रहने बताए ।
प्रकाशित मिति: बुधबार, साउन २, २०७५
-1732776560.jpg)
