काठमाडौं । नेपाल संस्कृत विश्वविद्यालयका उपकुलपति प्रा. डा. कुलप्रसाद कोइरालाले आफूलाई महत्वपूर्ण कामका लागि विदेश जानै लाग्दा विमानस्थलबाट सरकारले अपहरण गरेको भन्दै सरकारको कडा आलोचना गरेका छन् । उनले आफूलाई अपराधीजस्तो गरेर पक्रनु नेपाली र प्राज्ञिक क्षेत्रको अपमान भएको बताएका छन् ।
रिपोर्टर्स क्लबमा आइतबार भएको साक्षात्कारमा बोल्दै कोइरालाले भने, ‘म विनम्र अनुरोध गर्न चाहन्छु, ओलीज्यू हामीले पनि लोकतन्त्र र गणतन्त्रको लागि भूमिका खेलेका छौं, हवल्दारी पाराले प्राज्ञिक क्षेत्रलाई तहसनहस पार्न खोज्नु मुर्खता हो । मलाई यो किसिमको अपहरण किन गरियो ? मैले के अपराध गरेको थिएँ ? विश्व संस्कृत सम्मेलनमा भाग लिन जाँदा के भत्किने थियो ? तपाईले चालेको कदम अधिकानायवादको पूर्व संकेत हो, नेपालको लागि अधिनायकवाद कल्पनाभन्दा बाहिरको कुरा हो, सरकारका रवैयाहरुले राम्रो संकेत दिइरहेका छैनन् ।’
प्रधानमन्त्री ओली बहुमतको दम्भबाट ग्रसित रहेको भन्दैै कोइरालाले भने, ‘मैले अपमानका प्याला सहज तरिकाले पिउन सक्छु तर प्रजातन्त्र, लोकतन्त्र, गणतन्त्रको लागि लडेको सिँगो नेपाली समाजलाई यस्ता गतिविधि पाच्य हुँदैनन्’ ।
उनले भने, ‘म क्यानडामा पिकनिकको लागि जान खोजेको थिइन, हाम्रो सभ्यता, संस्कृत र संस्कृतिको प्रर्वद्धन तथा विकासको विषयमा अन्तर्राष्ट्रिय मञ्चमा भाग लिनको लागि जान लागेको थिएँ ।’
प्रकाशित मिति: शनिबार, असार २३, २०७५
-1732776560.jpg)
