विराटनगर । साढे ३८ क्वीन्टल सुन तस्करी र सनम शाक्य हत्याकाण्डका ११ जना अभियुक्तले जिल्ला अदालत मोरङको आदेशविरुद्ध उच्च अदालतमा निवेदन दर्ता गराएका छन् ।
उनीहरुले साधारण तारेखमा छाड्न माग गर्दै आफ्ना वकिलमार्फत उच्च अदालतमा मुलुकी ऐनको अदालती बन्दोबस्तको महलको १७ नम्बर अनुसार निवेदन दर्ता गराएका हुन् । यसअघि जिल्ला अदालत मोरङले उनीहरुलाई पुर्पक्षका लागि थुनामा पठाएको थियो ।
निवेदन दिनेहरुमा पूर्वडीआईजी गोविन्द निरौला, एसएसपी दिवेश लोहनी, एसपी विकासराज खनाल, डीएसपी सञ्जयकुमार राउत, गोरेका सहयोगी टेकबहादुर मल्ल, नेपाल एयरलाइन्सका कर्मचारी राजन थापा, हेमन्त गौतम, पुण्यप्रसाद लामा, भूजुङ गुरुङ र सम्बीरप्रसाद तोलाङ्गे रहेका छन् ।
अभियुक्तले उच्च अदालतमा निवेदन दर्ता गराएपछि जिल्ला अदालत मोरङले उच्च अदालत विराटनगरलाई अभियुक्तहरुले दिएको बयान, घटना मुचुल्का, अदालतको आदेशसहितको कैफियत प्रतिवेदन पठाएको छ ।
उच्च अदालतले आउँदो बिहीबार पेशी तोकेको र सोही दिन वादीको तर्फबाट उच्च अदालत विराटनगरका सहन्यायाधिवक्ता चिरञ्जीवी पराजुलीले बहस गर्ने बताइएको छ ।
प्रकाशित मिति: आइतबार, असार १०, २०७५
-1732776560.jpg)
