चितवन । चितवन राष्ट्रिय निकुञ्जले रत्ननगरको सौराहामा पालन पोषण गरेर राखिएको गैँडको बच्चा (केटो) लाई चीन पठाउने तयारी थालको छ।
केटोको स्वास्थ्य अवस्था राम्रो भएकाले चीन पठाउन लागिएको हो । राष्ट्रिय निकुञ्ज तथा वन्यजन्तु संरक्षण विभागका महानिर्देशक मनबहादुर खड्काले चिनियाँ र नेपाली पशु चिकित्सक सहित वन्यजन्तु प्राविधिज्ञको टोलीले लैजान योग्य छ भनेर प्रमाणित गरेपछि केटोलाई चीन पठाइने जानकारी दिए।
गत वर्ष बाढी आएसँगै नारायणीले बगाएर भारत पुराएकत्त केटोलाई त्यहाँबाट उद्दार गरि ल्याइएको थियो । अहिले केटोलाई राष्ट्रिय प्रकृति संरक्षण कोष सौराहाको खोरमा राखेर पालन पोषण गरिदै आएको छ । चितवन राष्ट्रिय निकुञ्जका सहायक संरक्षण अधिकृत नुरेन्द्र अर्यालले केटोलाई चीन पठाउन निकुञ्जले प्रस्ताव गरिसकेको बताए ।
राष्ट्रिय प्रकृति संरक्षण कोष सौराहाका निमित्त कार्यालय प्रमुख राम कुमार अर्याल अहिले केटो तन्दुरुस्त रहेको बताए। कोषका पशु चिकित्सक डा अमिर षडौलाले नियमित परीक्षण हुने गरेको बताउदै अहिले स्वास्थ्य राम्रो भएको जानकारी दिए ।
नेपालले छिमेकी मुलुक चीन लाई दुईजोडी गैँडा उपहार दिने सरकारी निर्णय भएको छ। तत्कालिन वनमन्त्री अग्नी सापकोटाको पालामा यस्तो निर्णय भएको थियो ।
चितवनमा गैँडा हस्तान्तरणका लागि गैँडाको खोजी भइरहेको छ। त्यसका लागि एक साता देखि प्राविधिकहरुको टोली निकुञ्जमा परिचालन गरिएको छ।
आगामी असार भित्रमा दुईजोडी गैडा चीन पठाउने योजना रहेको निकुञ्जले जनाएको छ । सौराहामा रहेको केटो चीन पठाउन योग्य भए निकुञ्ज बाट अरु एक भाले र दुई पोथी नियन्त्रणमा लिइनेछ ।
प्रकाशित मिति: बुधबार, वैशाख १२, २०७५
-1732776560.jpg)
