काठमाडौँ । प्रधानमन्त्री केपी शर्मा ओलीले मुगुमा एक विद्यार्थीलार्इ विद्यालय भर्ना गराएका छन् ।
दुई वर्षभित्र निरक्षरता हटाउने अभियानअनुसार मुगुको मुगुम कार्मारोंग गाउँपालिका वडा नं ८ का छिजु तामाङ र बाबु कार्मा टोन्डु लामाकी छ वर्षीया छोरी थिल्ने साङ तामाङलाई प्रधानमन्त्रीले विद्यालय भर्ना गराएका हुन्।
विसं २०६८ चैत १९ गते जन्मनुभएकी तामाङलाई बुद्ध मावि मांग्रीमा विद्यालय भर्ना गरिएको छ ।
छात्राको अभिभावकत्व ग्रहणको पुस्तिकामा हस्ताक्षर प्रधानमन्त्रीले गरेका छन्। तामाङलाई पोशाक र पुस्तक प्रदान गरेका छन् ।
प्रधानमन्त्री पत्नी राधिका शाक्यले पनि बुद्ध माविमा छेरिङ छोन्तोम लामालाई विद्यालय भर्ना गराएकी छिन्।
शाक्यले टोमा लामा र कार्मा नाम्ग्याल लामाकी छोरी छेरिङको अभिभावकत्व पनि ग्रहण गरेकी हुन्। छेरिङ २०६७ माघ १७ गते जन्मिएकि थिइन्।
रारा पर्यटन महोत्सवमा पुग्नुभएका प्रधानमन्त्रीले भर्ना सप्ताह शुरु भएको अवसरमा ती बालिकाको अभिभावकत्व लिँदै विद्यालय भर्ना गरिएको हो।
प्रधानमन्त्रीले दुई वर्षभित्र निरक्षरता हटाउने अभियान घोषणा गर्दै एक व्यक्तिले कम्तीमा एकजना विद्यार्थीको अभिभावकत्व ग्रहण गर्दै विद्यालय भर्ना अभियानमा सघाउन अपिल गरेका छन् ।
यसअघि प्रधानमन्त्री अोलीले मधेसको कुनै एक विपन्न परिवारका सदस्यलार्इ विद्यालय भर्ना गराउने बताएका थिए। तर उनी उच्च हिमाली जिल्लामा पुगेर विद्यार्थी भर्ना गराएका हुन्।
प्रकाशित मिति: शनिबार, वैशाख १, २०७५
-1732776560.jpg)
