काठमाडौँ । चितवनका पुराना कम्युनिष्ट नेता जागृतप्रसाद (जेपी) भेटवालको निधन भएको छ ।
क्यान्सर रोगबाट पीडित एमाले नेता भेटवालको आज विहान उपचारको क्रममा काठमाडौंस्थित वीर अस्पतालमा निधन भएको हो । मेडिसिटी अस्पतालमा उपचार गराईरहेका नेता भेटवाललाई अवस्था गम्भीर भएपछि केही दिन अघि बीर अस्पतालको आईसियूमा सारीएको थियो ।
क्यान्सरको अन्तिम स्टेजमा रहेको भेटवालको शरिरका सबै अंगमा क्यान्सर रोग फैलिसकेको थियो । भेटवाललाई ०६२ सालदेखि क्यान्सर रोगले छोई सकेको थियो । ०६६ सालमा राम्रोसँग उपचार गरेपछि क्यान्सर भएको पुष्टि भयो। भेटवाललाई शुरुमा प्रोस्टेटको क्यान्सर देखिएको थियो । नेता भेटवाल डेढमहिना अघिबाट काठमाडौंमा नै उपचार गराइरहेका थिए। नेता भेटवाल पूर्वी चितवन निवासी हुन् ।
प्रधानमन्त्री केपी शर्मा ओलीले एमाले नेता जागृत प्रसाद भेट्वालको निधनले पार्टीलाई अपुरणीय क्षती भएको बताउनुभएको छ ।
स्वर्गीय भेट्वाललाई पार्टीको झण्डा ओडाउदै प्रधानमन्त्री ओलीले निरंकुशताको अन्त्यका लागि भेट्वालको त्याग र संघर्षको महत्वपूर्ण योगदान रहेको बताउनुभएको छ । “निरंकुशताको अन्त्य र लोकतन्त्र स्थापनाको लागि उहाँको योगदान अतुलनीय थियो” प्रधानमन्त्री ओलीले भन्नुभयो “उहाँको निधनबाट देश र पार्टीलाई अपुरणीय क्षती भएको छ ।”
प्रधानमन्त्री ओलीले भेट्वालको निधनमा श्रद्धान्जली व्यक्त गर्दै शोक सन्तप्त परिवारमा समवेदना व्यक्त गर्नुभएको छ ।
भेट्वाल पार्टीको केन्द्रीय लेखा समितिको सदस्य हुनुहुन्थ्यो ।
यसैगरी आज बसेको पार्टी स्थायी कमिटिको भेट्वालको निधनमा दुःख व्यक्त गर्दै शोक सन्तप्त परिवारमा समवेदना व्यक्त गरेको छ ।
प्रकाशित मिति: मंगलबार, चैत २०, २०७४
-1732776560.jpg)
