काठमाडौँ । पाकिस्तानी प्रधानमन्त्री शाहिद खकान अब्बासी आफ्नो दुईदिने नेपाल भ्रमण सकेर स्वदेश फर्किएका छन् । नवनियुक्त प्रधानमन्त्री केपी शर्मा ओलीलाई बधाई दिन आएका अब्बासी सार्क सम्मेलन छिट्टै हुने विश्वास लिएर फर्किएका छन् । पाकिस्तानी प्रधानमन्त्री अब्बासीले सार्कमार्फत यस क्षेत्रको शान्ति र आर्थिक प्रगतिका निम्ति आफ्नो मुलुकले हरसम्भव प्रयास गर्ने प्रतिबद्धतासमेत जनाएका छन् ।
सार्क सचिवालयमा आयोजित कार्यक्रममा उनले सार्कका उद्देश्य, आदर्श र सिद्धान्तप्रति पाकिस्तानको अटुट आस्था रहेको बताउँदै सार्कको १९औं शिखर सम्मेलन शीघ्र हुनेमा विश्वस्त रहेको बताए ।
पाकिस्तानी प्रधानमन्त्रीले सचिवालय परिसरमा धुपीको बिरुवा रोप्दै सार्कको प्रक्रियालाई अगाडि बढाउन पाकिस्तान तयार रहेको बताएका थिए । यसअघि सोमबार राति प्रधानमन्त्री ओलीसँगको भेटमा सार्कलाई गति दिने विषयमा छलफल भएको थियो ।
सार्कको अध्यक्ष राष्ट्रका हैसियतले नेपालले सार्कलाई अगाडि बढाउन पहल गरोस् भन्ने पाकिस्तानी प्रधानमन्त्रीले चाहना व्यक्त गरेका थिए । सो भेटपछि मंगलबार सार्क सचिवालयमा भएको कार्यक्रममा उनले शिखर सम्मेलन छिट्टै हुने विश्वास व्यक्त गरेका हुन् ।
कार्यक्रममा सार्कका महासचिव अमजद बी सियालले १८औं शिखर सम्मेलनमा सार्क नेतृत्वले हरेक दुई वर्षमा शिखर बैठक गर्ने निर्णय गरेबमोजिम संगठनलाई गतिशील तुल्याउन १९औं सम्मेलन गर्नुपर्ने बताएका थिए । यसअघि पाकिस्तानले सार्कका दुई शिखर सम्मेलन आयोजना गरिसकेको भन्दै १९औं सम्मेलन पनि सम्पन्न गर्ने विश्वास व्यक्त गरेका थिए ।
प्रकाशित मिति: मंगलबार, फागुन २२, २०७४
-1732776560.jpg)
