पाल्पा । लामो समय देखि लघु जलविद्युत् आयोजना बन्द हुँदा जिल्लाको रामपुर १ स्याउलीबजारका स्थानीयहरू अन्धकारमा बस्न बाध्य भएका छन् ।
चार बर्ष देखि यहाँको लघुजलविद्युत् आयोजना बन्द छ । अायोजना बन्द हुँदा स्थानीयहरू रातमा अन्धकारमा बस्न बाध्य भएका हुन् । बन्द आयोजना बिग्रेको चार वर्षसम्म कहीँकतैबाट मर्मतका लागि पहल हुन नसक्दा टुकीको भरमा रात बिताउनु पर्ने बाध्यता रहेको स्थानीयले गुनासाे गरेका छन् ।
आयोजना मर्मत हुन नसक्दा यहाँका ७५ घरपरिवार अँध्यारोमा रात बिताउनुपर्ने अवस्था टरेको छैन । लघु जलविद्युत् आयोजना सञ्चालनमा आउन नसक्दा रेडियो, टेलिभिजन, मोबाइल, लाइटलगायतका सामान प्रयोगमा ल्याउन समस्या भएको छ ।
१.५ किलोवाट क्षमताको अायोजना मर्मत हुन नसकेको हो । यसलार्इ मर्मत गर्न सरोकारवाला निकायले समेत चासो दिएका छैनन् ।
विद्युतगृह मर्मत नहुँदा स्याउलीबजार नगरभित्रकै अन्धकार बस्तीमा परिणत भएको छ । रामपुर नगरपालिका–१ मा करिब ७५२ घरधुरी रहेका मध्ये ७५ घरपरिवार यस अायोजनाबाट लाभान्वित हुँदै अाएका थिए । सिंगो वडामा ४० घरपरिवारको घरमा मात्र विद्युत् सुविधा रहेको स्थानीय बासिन्दा बताउँछन् ।
प्रकाशित मिति: बिहीबार, माघ ११, २०७४
-1732776560.jpg)
