१३ पुस, काभ्रे । बनेपाको बुडोलमा रहेको रेयुकाई मासुनागा सामुदायिक आँखा अस्पतालले आँखाको उपचार गराउन गएकी एक महिलालाई एचआइभी एड्स लागेको पुष्टि गरी व्यक्तिगत मानहानी गरेको पाइएको छ । अस्पतालले एड्सको पुष्टि गरेपछि अस्पतालमा कार्यरत स्वास्थ्यकर्मीले उपचार गर्न आनाकानी गर्दै हल्लीखल्ली गरेका थिए । एचआइभी नभएकी निरोगी महिलालाई एचआइभी एड्स भएको पुष्टि गर्दै अनर्गल प्रचार गरिएपछि पीडित महिला यतिबेला मानसिक रुपमा विचलित भएकी छिन् । एड्स भएको पुष्टि हुँदा पनि सम्बन्धित व्यक्तिको अनुमतिमा मात्रै दम्पतीको बीचमा खुलाउन मिल्ने प्रावधान रहेको छ । तर रेयुकाई आँखा अस्पतालले भने सम्बन्धित व्यक्तिलाई जानकारी नै नदिएर अस्पतालभर हल्लीखल्ली गरेको पीडित महिला बताउँछिन् ।
जसकाकारण आम सर्वसाधारणसम्म उक्त हल्ला डडेलोझै फैलियो । श्रीमान र श्रीमतीको बीचमा पनि सहमति वा सम्बन्धित व्यक्तिको स्वीकृतिमा मात्रै खुलाउनु पर्ने गोपनीयताको कुनै ख्याल नराखी पब्लिकमा समेत सार्वजनिक गर्दै उपभोक्ता अधिकार र गोपनीयताको हकमाथि गम्भीर खेलबाड उक्त अस्पतालले गरेको छ । यस्तो अवस्थामा अस्पतालले आम माफी माग्नु पर्ने र पुष्टि गर्ने स्टाफलाई कारबाही नगरे सम्बन्धी व्यक्ति अदालत जानसक्ने कानुनी व्यवस्था भएको अधिकारकर्मीहरु बताउँछन् । काभ्रेकी ती महिलालाई एचआईभी एड्स लागेको पुष्टि अस्पतालले गरेपछि ती महिलाले अस्वीकार गर्दै धुलिखेल अस्पतालमा पुनः परीक्षण गराएकी थिइन् । धुलिखेल सामुदायिक अस्पतालमा परीक्षण गरेपछि अस्पतालका डाक्टरहरु बसेर पीडित महिलालाई एचआइभी नभएको पुष्टि गरेका थिए । धुलिखेल अस्पतालले पीडितका परिवारलाई सम्झाउँदै भ्रमका कारण मानसिक रुपमा विचलित नहुन र बाहिर सार्वजनिक नगर्न सुझाएका थिए । धुलिखेल अस्पतालका स्वाथ्यकर्मीहरुले डाक्टरको लापरवाहीका कारण गलत रिर्पोट बाहिर ल्याएकोले पीडितलाई चिन्तित नहुन सुझाएका थिए ।
आँखा सम्बन्धी सामान्य विरामीलाई एचआइभी एड्स भएको पुष्टि गरेपछि उक्त आँखा अस्पताललाई स्वास्थ्यसम्बन्धी कुनै जानकारी नभएको जानकारहरु बताउँछन । अस्पतालले यसरी झुट्टो अभियोग लगाउने र व्यक्तिको स्वास्थ्यमाथि खेलबाड गरी गोपनीयताको हक उल्लंघन गरी नभएको रिपोर्ट बाहिर ल्याएर गम्भीर अपराध गरेको कानुनविदको भनाई छ । भएका विरामीहरुलाई पनि बाँचौंबाँचौ लाग्ने गरानु पर्नेमा अस्पतालले हिनताबोध गराएर अपराध गरेको विश्लेषकहरु बताउँछन् । अस्पतालको लापरवाहीका बारेमा अस्पताल सञ्चारक समितिका अध्यक्ष मधुप्रसाद आचार्यसँग सम्पर्क गर्दा उनले फोन उठाएनन् । यसअघि अस्पतालमा स्थानीय र पीडित पक्षसँग भएको वार्तामा अस्पताल सञ्चालकले १ हस्ताभित्र नभएको रिपोर्ट बाहिर ल्याउने कर्मचारीलाई निश्काशन गर्ने सहमति गरेको थियो । निश्काशनको कारबाही गरेको लिखित पत्र उपलब्ध गराउने र पीडितसँग आम माफी माग्ने भनिएको थियो । तर, अस्पतालले एकसाता वित्दा पनि पीडितसँग कुनै सम्पर्क नगरेको बुझिएको छ ।
प्रकाशित मिति: बुधबार, पुस १२, २०७४
-1732776560.jpg)
