९ पुस, काठमाडौँ । प्रेस चौतारी नेपालले नेपाल प्रहरीले पाँच सञ्चार माध्यम र त्यसका सम्पादकहरुलाई काटेको पत्रप्रति आपत्ति जनाएको छ । चौतारीका महासचिव राजेश राईले विज्ञप्ति मार्फत समाचारको स्रोत माग्दै प्रहरीले पत्र काटेकाप्रति गम्भीर ध्यानाकर्षण भएको जनाएका छन । विज्ञप्तिमा वाम गठबन्धनको साझा उम्मेदवार भएर ललितपुर–१ बाट प्रतिनिधिसभामा विजयी सांसद तथा पूर्वप्रहरी नायव महानिरीक्षक (डिआइजि) नवराज सिलवाल विरुद्धको मुद्दा छानविन गर्ने नाममा सञ्चार माध्यमहरुलाई आदेशको शैलीमा काटिएको पत्रले आश्चर्यचकित बनाएको उल्लेख गरिएको छ । महानगरीय प्रहरी परिसर काठमाडौंले रोशन खड्का (काठमाडौंपार्टी डटकम), रवि धामी (मुलधारन्युज डटकम) मदनबाबु भण्डारी (सुशासन डटकम), खिलानाथ ढकाल (सुभदिन डटकम) र रोशन पाण्डे (जनप्रहार साप्ताहिकरअपराध खबर डटकम)लाई सिलवालसँग सम्बन्धित समाचारको स्रोत माग्दै पत्रचार गरेको छ ।
पत्रकारहरुका अनुसार प्रहरी महानिरीक्षक (आइजिपी) प्रकाश अर्यालले काठमाडौं प्रहरी प्रमुख प्रहरी वरिष्ठ उपरीक्षक (एसएसपी) रवीन्द्र धानुक र मुद्दा शाखाका प्रहरी नायव उपरीक्षक (डिएसपी) बेलबहादुर पाण्डेलाई पाँचै जना पत्रकारहरुको पछिल्लो एक वर्षको ‘कल डिटेल’ लिन निर्देशन समेत दिएका छन् । विज्ञप्तिमा भनिएको छ ‘प्रकाशित समाचारको स्रोत दिन आदेश सहित पत्र लेखिनु र पत्रकारको ‘कल डिटेल’ मागिनु प्रेस तथा अभिव्यक्ति स्वतन्त्रता विरुद्धको नांगो हस्तक्षेप मात्रै नभई यो राज्य आतंक समेत हो । प्रेस काउन्सिल नेपालको अधिकार क्षेत्रभित्र रहेको विषयलाई नेपाल प्रहरीले हस्तक्षेप गरी संबैधानिक र कानुनी व्यवस्थाको समेत धज्जी उठाएको छ । नेपाल प्रहरीको यो कदमप्रति प्रेस चौतारी खेद व्यक्त गर्दै भत्र्सना गर्दछ ।’ प्रेस तथा अभिव्यक्ति स्वतन्त्रता र संबैैधानिक व्यवस्था विरोधी यो कदम तत्काल सच्चाउन चौतारीले प्रहरीलाई आग्रह गरेको छ । चौतारीले पत्रकारलाई स्वतन्त्र र भयरहित पत्रकारिता गर्ने वातावरण निर्माण गर्न सम्बन्धित सबै पक्षसँग माग समेत गरेको छ ।
प्रकाशित मिति: शनिबार, पुस ८, २०७४
-1732776560.jpg)
