काठमाडौँ । एक वर्षपछि नेपाली कांग्रेसको केन्द्रीय समिति बैठक सुरु भएको छ। पार्टी केन्द्रीय कार्यालय सानेपामा सुरु भएको बैठकको पार्टीको आधिकारिक फेसबुक पेजमा लाइभ (प्रत्यक्ष प्रशारण) गरिएको छ।
कांग्रेसले पहिलो पटक बैठकको प्रत्यक्ष प्रशारण गरेको हो। बैठकमा १० वटा एजेन्डा तय गरिएका छन् । महामन्त्री विश्वप्रकाश शर्माका अनुसार पहिलो एजेन्डाका रुपमा समसामयिक राजनीतिक विषय रहनेछ । यसभित्र राजनीतिक, आर्थिक, सामाजिक, परराष्ट्र र सुशासनसँग सम्बन्धित विषयहरुमा छलफल हुनेछ।
त्यसैगरी सांगठनिक कार्ययोजना र कार्यतालिकासमेत एजेन्डाका रुपमा प्रस्तुत हुनेछ । कार्यसम्पादन समितिले गरेका निर्णयहरूको अनुमोदन, निर्वाचन परिचालन समितिको प्रतिवेदनमाथि छलफल र पार्टीको नीति अधिवेशनसँग सम्बन्धित खाका पनि बैठकमा प्रस्तुत हुने महामन्त्री शर्माले बताए।
त्यस्तै केन्द्रीय कार्यसमिति बैठकमा विभागहरू गठनका साथै पार्टीले सञ्चालन गर्ने राष्ट्रव्यापी अभियानको खाका प्रस्तुत हुनेछ । अनुशासन समितिको प्रतिवेदन पेस गर्ने एजेन्डा पनि तय भएको छ ।
पार्टीले प्रतिनिधिसभामा खेलेको भूमिकाका सन्दर्भमा संसदीय दलका प्रमुख सचेतक रमेश लेखकले बैठकमा जानकारी गराउनेछन्। उपसभापति तथा उपप्रधानमन्त्री पूर्णबहादुर खड्काले सरकारको गतिविधि सम्बन्धमा बैठकलाई जानकारी गराउने कार्यसूची तय भएको छ।
बैठक एक सातासम्म चल्न सक्ने बताइएको छ । विधानअनुसार केन्द्रीय कार्यसमितिको बैठक प्रत्येक दुई महिनामा कम्तीमा एकपटक बस्नुपर्ने भए पनि एक वर्षपछि बैठक बस्न लागेको हो ।
पछिल्लो पटक २०७९ साल असार २७ देखि साउन २ गतेसम्म केन्द्रीय समिति बैठक बसेको थियो । त्यसयता बैठक बस्न नसक्दा काँग्रेसले मंसिरमा सम्पन्न प्रदेश र प्रतिनिधिसभा चुनावको समीक्षा पनि गर्न सकेको छैन ।
प्रकाशित मिति: मंगलबार, साउन २, २०८०
-1732776560.jpg)
