काठमाडौँ । ललिता निवासको जग्गा हडपेको प्रकरणमा केन्द्रीय अनुसन्धान ब्युरो (सिआइबी)ले सङ्गठित अपराधमा अनुसन्धान थालेको छ।
काठमाडौँ जिल्ला अदालतबाट अनुमति लिएर सिआइबीले उनीहरूमाथि सङ्गठित अपराधमा अनुसन्धान थालेको हो। अहिलेसम्म यस प्रकरणमा सिआइबीले ९ जनालाई पक्राउ गरिसकेको छ।
यसअघि सिआइबीले यो प्रकरणमा सरकारी कागजात किर्ते कसुरमा अनुसन्धान गरिरहेको थियो। तर आरोपीहरूले सङ्गठित रूपमा अपराध भएको भन्दै सङ्गठित अपराधमा पनि अनुसन्धान थालेको हो।
सिआइबीले उनीहरूलाई मङ्गलवार सरकारी वकिलको कार्यालय काठमाडौँ मार्फत अदालतमा म्याद थपका लागि पेश गरेको थियो।
गत बुधबार अदालतमा पेश गर्दा कीर्ते कसुरमा ७ दिनको म्याद थप भएको थियो। हिजो भने अदालतले उनीहरूलाई सङ्गठित अपराध कसुरमै अनुसन्धान गर्न ७ दिन हिरासतमा राखेर अनुसन्धान गर्न अनुमति दिएको हो।
कीर्ते कसुरमा आरोपीलाई जम्मा २५ दिनमात्रै हिरासतमा राख्न पाउँछ। सङ्गठित अपराध कसुरमा म्याद थप भएसँगै प्रहरीले थप समय पाउने भएको हो।
सरकारी वकिल कार्यालय काठमाडौँका अनुसार सङ्गठित अपराधमा ६० दिनको म्याद पाइन्छ।
यस प्रकरणमा संलग्न रहेको आरोपमा असार १२ गते चार जनालाई हिरासतमा राखेको थियो।
भाटभटेनी सुपरमार्केटका सञ्चालक मीनबहादुर गुरुङ, पूर्वनिर्वाचन आयुक्त सुधिरकुमार शाह, धर्मप्रसाद गौतम र गोपाल कार्की प्रहरी हिरासतमा बसेका थिए।
त्यसदिन देखि नै ६० दिनको मिति गणना हुन्छ। उनीहरूलाई पक्राउ गरेको आज नवौँ दिन हो। अनुसन्धान गर्न प्रहरीसँग अझै ५१ दिन बाँकी छ।
तर पक्राउ परेका गुरुङ, शाह र गौतमले सर्वोच्चमा बन्दीप्रत्यक्षीकरणको रिट हालेका छन्। त्यससम्बन्धमा गत शुक्रबार सर्वोच्चका न्यायाधीश कुमार चुडालले कारण देखाऊ आदेश जारी गरेका थिए।
सिआइबीले त्यसको पनि जवाफ फर्काइसकेको छ।
प्रकाशित मिति: बुधबार, असार २०, २०८०
-1732776560.jpg)
