काठमाडौँ । प्रधानमन्त्री पुष्पकमल दाहाल ‘प्रचण्ड’ले नेपाली कांग्रेसका तत्कालीन सभापति गिरिजाप्रसाद कोइरालालाई गणतन्त्र नेपालको पहिलो राष्ट्रपतिमा प्रस्ताव नगरेकोमा पुनः पश्चात्ताप व्यक्त गरेका छन् ।
कोइरालाको १००औं जन्मजयन्तीका अवसरमा राजधानीमा आयोजना गरिएको एक कार्यक्रममा माओवादी केन्द्रका अध्यक्षसमेत रहेका प्रधानमन्त्री दाहालले गिरिजाप्रसाद कोइरालाले छाडेर गएका शान्ति प्रक्रियाका बाँकी काम पुरा गर्न आफू लागि परेको दाबी गरे ।
त्यसका लागि नै काँग्रेससँग मिलेर सरकार बनाएको धारणा राख्दै प्रधानमन्त्री दाहालले भने, ‘उहाँलाई राष्ट्रपतिको प्रस्ताव नगरिराख्दा सायद उहाँले मलाई पहिलाको जस्तो भरोसा र विश्वास गर्नुहुन्न कि जस्तो लाग्थ्यो तर उहाँले त्यस्तो गर्नुभएन । मैले प्रधानमन्त्रीबाट राजीनामा गर्ने मनस्थिति बनाएपछि पटक पटक राजीनामा नदिन भन्नुहुन्थ्यो।’
कोइरालामा राजनीतिक सुझबुझ र दुर्रष्टिकै कारण अहिलेको परिवर्तन सम्भव भएको दाहालले बताए । आफूले कोइरालालाई आशंका र अविश्वासका दृष्टिले हेरेको धारणा राख्दै उनले भने, ‘बरु मैले गल्ती गरेँ, उहाँले विल्कुल गल्ती गर्नुभएन । मैले बरु उहाँसँग लिएका प्रतिबद्धता सबै जस्ताको तस्तै पुरा गर्न कतिपय सन्दर्भमा सकिनँ ।’
गणतन्त्रको छोटो समयमा प्रश्न उठाउन खोजिएको भन्दै प्रधानमन्त्री दाहालले थपे,‘गिरिजाप्रसादको पार्थिव शरीर अगाडि गरेको सङ्कल्प, त्यो दिन जनताको भाव, लाखौँ जनसागरलाई यति छिटै बिर्सने र पुरातनतिर फर्कन खोज्ने हामी नेपालीको दृष्टि के हो भन्ने आम प्रश्न पनि छ । हामीले व्यवस्था बदल्न साहस गर्यौ, जनताको अवस्था बदल्न सकेनौ त्यसमा आत्मसमीक्षा गर्न जरुरी छ ।’
प्रधानमन्त्री दाहालले कोइरालाको नाममा विश्वविद्यालय स्थापना गर्न पहल गर्ने पनि आश्वासन दिए ।
कम्युनिष्ट एकताले कांग्रेस तरंगित हुनु पर्दैन
प्रधानमन्त्री दाहालले कम्युनिष्टहरुको एकताको कुराबाट कांग्रेस तरंगित हुन नहुने पनि बताए । कम्युनिष्टहरूबीच एकता भए पनि कांग्रेससँगको सम्बन्ध नटुट्ने धारणा राख्दै दाहालले भने,‘मैले लेफ्टहरुको युनिटीको कुरा गर्दा काँग्रेससँग डिसयुनिटी हुनेछैन । कन्भिक्सनको लेभलमा मेरो कमिटमेन्ट छ । त्यसकारण यो प्रक्रिया अगाडि जान्छ, जानुपर्छ । ‘
प्रकाशित मिति: सोमबार, असार १८, २०८०
-1732776560.jpg)
