काठमाडौँ । जनता समाजवादी पार्टीका अध्यक्ष उपेन्द्र यादवले समाजवादी मोर्चा कसैप्रति लक्षित नबनेको भएकाले अहिलेदेखि नतर्सिन आग्रह गरेका छन् ।समाजवादी मोर्चा घोषणा सभालाई सम्बोधन गर्दै उनले मोर्चा घोषणाअघि नै केही व्यक्तिहरू बर्बराउन थालेको बताए ।
उनले भने, ‘चार दल मिलेर साझा कुराहरूमा हामी अगाडि बढ्छौँ । दलहरूको आआफ्नो विचार र दृष्टिकोण छन् । तर, साझा मुद्दालाई लिएर अगाडि बढ्छौँ । यो मोर्चाले भविष्यमा सफलता पाउने कुरामा ढुक्क हुनुपर्छ । हुन त मोर्चा र गठबन्धन बन्दै भत्किँदै गरेकाले के हो, कसो हो भन्ने लागेको पनि हुनसक्छ ।त्यो आशङ्का हुन पनि सक्छ । त्यसलाई हामीले व्यवहारबाट गलत साबित गर्दै निश्चित उद्देश्य प्राप्तिका लागि वैचारिक राजनीतिक रूपमा अगाडि बढाएका हौँ । यो आफ्नो लक्ष्यअनुसार बढ्नेमा ढुक्क छौँ । यो मोर्चाले गर्दा कसैलाई तर्सिनुपर्दैन । हामी परिवर्तन र राष्ट्र निर्माणमा अघि बढ्छौँ । यो कसैको विरुद्धमा लक्षित छैन ।केही साथीहरू अघि नै बर्बराउन थालेको देख्छु । हामी देश र जनताको लागि सहकार्य र सहयोगको आधारमा अगाडि बढ्छौँ । तर, प्रतिगमनकारी शक्तिहरू जसले संघीय लोकतान्त्रिक गणतन्त्रलाई समाप्त पार्ने खेल खेलेका छन्, तिनका विरुद्ध यो मोर्चा होमिनेछ । आवश्यक परे सङ्घर्ष पनि गर्छ ।’
प्रकाशित मिति: सोमबार, असार ४, २०८०
-1732776560.jpg)
