काठमाडौं : सरकारले सोमबार संसद्मा प्रस्तुत गरेको आर्थिक वर्ष २०७५/७६ को आर्थिक सर्वेक्षणमा मागको ९० प्रतिशत सिमेन्ट नेपालमा नै उत्पादन भइरहेको जनाइएको छ ।
सिमेन्ट उद्योगको विकास तथा सञ्चालनमा उल्लेखनीय सफलता प्राप्त भई वार्षिक ४५ लाख टन सिमेन्ट उत्पादन भई मागको ९० प्रतिशत सिमेन्ट स्वदेशमै उत्पादन भई सिमेन्टको आयातमा कमी आएको सर्वेक्षणमा उल्लेख गरिएको छ ।
सर्वेक्षणअनुसार हालसम्म २० हजार टन दैनिक सिमेन्ट उत्पादन गर्ने क्षमता भएका २६ सिमेन्ट उद्योग स्थापना भई सञ्चालन छन् । यस्तै छ सिमेन्ट उद्योग निर्माणाधीन अवस्थामा छन् ।
यस्तै सर्वेक्षणमा एक सय सात अर्ब टन चुनढुंगा अन्वेषण गरिएको उल्लेख छ । जम्मा ६४ करोड टन प्रमाणित, ११ करोड टन अर्ध–प्रमाणित र ३२ करोड टन सम्भाव्य गरी अन्वेषण गरिएको सर्वेक्षणमा उल्लेख गरिएको छ ।
सरकारले उदयपुर, धनकुटा, खोटाङ, सिन्धुली, मकवानपुर, ललितपुर, धादिङ, स्याङ्जा, अर्घाखाँची, पाल्पा, दाङ, सल्यान, सुर्खेत, बैतडीलगायतका जिल्लामा चुनढुंगा अन्वेषण गरेको हो ।
यस्तै शीघ्र आर्थिक तथा वित्तीय प्रतिफल प्राप्त हुने खनिज खरी, मार्बल, जेम्स स्टोन, कोइला, क्वार्जाइट, क्यालासाइट र रातोमाटोमा आधारित साना तथा मझौला स्तरका खनिज भण्डारको अन्वेषणदेखि उत्पादनसम्मको कार्यका लागि आव २०७४÷७५ सम्म १२९ उत्खनन र ३६२ खोजतलास कार्यको प्रमाणपत्र प्रदान गरिएको छ ।
यस्तै काठमाडौं उपत्यका, पोखरा, बुटवल, भैरहवा, हेटौँडा, धरान, विराटनगर, सुर्खेत, नेपालगञ्ज, जनकपुर, धनगढी, महेन्द्रनगर, भरतपुर, विदुर, जलेश्वरलगायत शहरको व्यवस्थित शहरी विकास र फोहरमैला व्यवस्थापनका लागि भू–इञ्जिनीयरिङ तथा भू–वातावरणीय अन्वेषणको सर्वेक्षणको कार्य सम्पन्न भएको जनाइएको छ ।
यसैगरी चुनढुंगा, पत्थर, कोइला, खरी टुर्मालिन, काइनाइटलगायत ११ खनिजमा आधारित जम्मा १३१ खानी सञ्चालनमा छन् । ती खानीमा छ हजार पाँच सय जनशक्तिले रोजगारी पाएका छन् । खनिजमा आधारित ६७ उद्योगमा करिब ४.५ अर्ब रुपैयाँ वैदेशिक लगानी स्वीकृत भई सोबाट थप करिब आठ हजार छ सय रोजगारी सिर्जना हुने अनुमान गरिएको सर्वेक्षणमा उल्लेख गरिएको छ । –रासस
प्रकाशित मिति: मंगलबार, जेठ १४, २०७६
-1732776560.jpg)
