काठमाडौं : नेपाल विद्युत् प्राधिकरणले हेटौँडा–भरतपुर–बर्दघाट २२० केभी प्रसारण लाइन आयोजनाअन्तर्गत हेटौँडा–भरतपुर खण्डको ठेक्का तोडेको छ ।
कामको प्रगति सन्तोषजक नभएपछि प्राधिकरणले भारतीय कम्पनी आईकम टेलसँगको ठेक्का केही दिनअघि तोडेको हो ।
कम्पनीले कार्यसम्पादन जमानतवापत राखेको ३० लाख ५७ हजार अमेरिकी डलर पनि जफत गरेको छ । यसैगरी प्राधिकरणले काम ढिला गरेवापत करिब १६ लाख डलर विलम्ब जरिमाना पनि लगाउने निर्णय गरेको छ ।
प्राधिकरणले यसअघि आयोजनाअन्तर्गतको भरतपुर–बर्दघाट खण्डको सेन्ट्रल चाइना पावर ग्रिड (सीसीपीजी)सँगको ठेक्का तोडेको थियो । प्राधिकरणको सिफारिसमा केही दिनअघि सार्वजनिक खरिद अनुगमन कार्यालयले नेपालको ठेक्कापट्टामा तीन वर्षसम्म भाग लिन नपाउने गरी सीसीपीजी कालाेसूचीमा राख्ने निर्णय गरिसकेको छ ।
ठेक्का तोडेपछि कार्यकारी निर्देशक घिसिङ, दातृ निकाय विश्व बैंकका नेपाल कार्यालयका देशीय प्रबन्धक फारिस हढाढ जर्भोससहितको टोलीले आइतबार र सोमबार मकवानपुरको हेटौँडामा पर्ने आयोजना निर्माणस्थलको निरीक्षण गरेका छन् ।
कार्यकारी निर्देशक घिसिङले कम्पनीले निर्माण कार्य ठप्प पारी ठेक्का सम्झौताको उल्लघंन गरेकाले ठेक्का तोडिएको जानकारी दिए ।
सो कम्पनीसँगको ठेक्का तोडिएसँगै प्राधिकरणले नयाँ ठेक्कापट्टको प्रक्रिया अन्तिम चरणमा पुर्याएको छ । तत्काल टेन्डर आह्वान गर्ने तयारी प्राधिकरणको रहेको स्रोतले जानकारी दिएको छ ।
प्राधिकरण र कम्पनीबीच ७४ किलोमिटर हेटौँडा–भरतपुर २२० केभी डबल सर्किट प्रसारण लाइन निर्माणका लागि २०६५ को फागुनमा ९६ लाख ३६ हजार अमेरिकी डलर र १९ करोड ७३ लाख १५ हजार रुपैयाँमा ठेक्का सम्झौता भएको थियो । यस खण्डमा पर्ने २२६ टावरमध्ये १६८ को जग हालिएको छ भने ११९ वटा खडा गरिएको छ । १२ किलोमिटर मात्रै तार तानिएको छ ।
आयोजनाअन्तर्गतको भरतपुर–बर्दघाट निर्माणका लागि नयाँ टेन्डर गरी चिनियाँ कम्पनी हेङ्टन अप्टिक्स इलेक्ट्रिकसँग २०७५ साउनमा ५५ लाख ७५ हजार डलरमा ठेक्का सम्झौता भएको थियो ।
यो खण्डमा पर्ने २४६ टावरमध्ये १३७ को जग हालिएको र १०१ खडा गरिएको छ । तार भने तानिएको छैन । निर्माण २०७६ को माघभित्रमा सक्ने लक्ष्य राखिएको छ ।
कार्यकारी निर्देशक घिसिङले आयोजना प्रमुखसँग छलफल गरी तोकिएकै समयमा काम सम्पन्न गर्न निर्देशन दिए । प्राधिकरणकातर्फबाट गर्नुपर्ने रूख कटान तथा निजी जग्गा प्राप्तिको समस्या समाधान गर्ने प्रतिबद्धता जनाउँदै उनले महत्त्वपूर्ण यस आयोजनाको कामलाई तीव्रता दिन श्रमिकको संख्या थप्न निर्देशन दिए ।
नेपालभित्रको प्रसारण लाइन सुदृढ तथा विश्वसनीय बनाउन र पश्चिम क्षेत्रमा निर्माण हुने जलविद्युत् आयोजनाको विद्युत् प्रवाहका लागि हेटौंडा–भरतपुर–बर्दघाट प्रसारण लाइनको निर्माण गर्न लागिएको हो । नेपाल सरकार तथा प्राधिकरणको लगानी र विश्व बैंकको सहुलितपूर्ण कर्जामा आयोजना निर्माण भइरहेको छ ।
सबस्टेसनको निरीक्षण
कार्यकारी निर्देशक घिसिङ र दातृ निकाय विश्व बैंकको टोलीले हेटौँडामा निर्माणाधीन सबस्टेसनको निर्माण प्रगतिको निरीक्षण गरेको थियो ।
हेटौँडा–भरतपुर–बर्दघाट प्रसारण लाइन आयोजनाअन्तर्गत हेटौँडा, भरतपुर र बर्दघाटमा १३२ केभी सबस्टेसनको निर्माण भइरहेको छ ।
चिनियाँ ठेकेदार कम्पनी जोन्डिङ इन्टरनेसनलको लापरबाही र कमजोर कार्यसम्पादनका कारण आयोजना रुग्ण बनेको छ । कुलेखानी तेस्रोमा जस्तै चिनियाँ कम्पनीको नेपाली साझेदार हुलास इन्जिनियरिङका कारण सबस्टेसन निर्माण रुग्ण बनेको हो । तीनवटै सबस्टेसन निर्माणको समग्र प्रगति ९३ प्रतिशत छ ।
हेटौँडा–ढल्केबर–इनरुवा ४०० केभी प्रसारण लाइन आयोजनाअन्तर्गत हेटौँडामा २२० र ४०० केभी सबस्टेसनको पनि निर्माण भइरहेको छ । प्राधिकरणले हैटौँडा, ढल्केबर र इनरुवामा २२० केभी सबस्टेसन निर्माणको ठेक्का पाएको सीसीपीजीसँगको ठेक्का तोडी नयाँ ठेकेदार नियुक्त गरेको छ ।
ढल्केबरमा २२० केभी सबस्टेसन निर्माण सम्पन्न भई सञ्चालनमा आइसकेको छ । हेटौंडा र इनरुवामा सबस्टेसन निर्माणमा भारतीय कम्पनीसँग ठेक्का सम्झौता भएको छ । कम्पनीले काम सुरु गरिसकेको छ । हेटौँडा, ढल्केबर र इनरुवामा ४०० केभी सबस्टेसन पनि निर्माणाधीन छ ।
प्रसारण लाइन र सबस्टेसनको निर्माण सम्पन्न भएपछि पूर्व–पश्चिमको विद्युत् प्रवाह सहज हुने बताइएको छ ।
-1732776560.jpg)
