काठमाडाैं : विदेशी लगानीलाई आकर्षित गर्ने उद्देश्यले दुई दिने लगानी सम्मेलन आज सुरु हुँदै छ । राजधानीको सोल्टी होटलमा प्रधानमन्त्री केपी शर्मा ओलीले सम्मेलनको उद्घाटन गर्ने छन् ।
नेपालको आतिथ्यलाई स्वीकार गर्दै लगानी सम्मेलनमा छ सयभन्दा बढी विदेशी पाहुना सहभागी हुने छन् । सम्मेलनमार्फत ३० खर्ब रुपैंयाभन्दा बढी लगानी भित्रिने सरकारले अपेक्षा गरेको छ ।
सम्मेलनकाे पहिलाे दिन आज पाहुनाहरुको स्वागत गर्ने, प्रधानमन्त्री ओलीले सम्मेलन उद्घाटन गर्ने र सरकारले गरेको नीतिगत सुधारबारे जानकारी दिइने कार्यक्रम छ भने विभिन्न वक्ताहरुले आफ्नो विचार व्यक्त गर्ने छन् ।
नेपाल लगानी बोर्डका अनुसार लगानीका सम्भावित परियोजनासहित लगानीका कानुनी तथा प्रक्रियागत पक्ष, लगानी सुरक्षा र प्रतिफल फिर्ता लैजाने सम्बन्धमा सरकारले लगानीकर्तालाई जानकारी गराउन लागेको उक्त लगानी सम्मेलनमा एक हजार जनाको सहभागिता रहने छ ।
सरकारको पहलमा निजी क्षेत्रले पनि हातेमालो गर्दै विदेशी लगानीकर्तासँग सम्बन्ध स्थापना गर्न लागेको उक्त सम्मेलनमा ४० देशबाट छ सय विदेशी लगानीकर्ता तथा तिनका प्रतिनिधि सहभागी हुने छन् । त्यसैगरी नेपाली लगानीकर्ताको पनि उल्लेख्य सहभागिता हुने छ । चार सयजति गैरआवासीय नेपाली र स्वदेशी लगानीकर्ताको सहभागिता रहने बोर्डले जनाएको छ।
लगानी बोर्डका उपाध्यक्षसमेत रहेका अर्थमन्त्री डा युवराज खतिवडाका अनुसार सार्वजनिक क्षेत्रका ५० र निजी क्षेत्रका २७ गरी कुल ३४ खर्ब ६८ अर्ब रुपैयाँ लागतका ७७ आयोजना प्रदर्शनीमा राखिने छन्। विश्वका प्रतिष्ठित प्रविधिमा आधारित माइक्रोसफ्ट, अमेजनजस्ता कम्पनीका प्रतिनिधि काठमाडौं आएकाले पनि प्रविधि विकासमा नेपालले फड्को मार्ने आशा गर्न सकिन्छ ।
नेपालले वि.सं २०४९ मा विदेशी लगानी तथा प्रविधि हस्तान्तरण कानुन जारी गरी विदेशी लगानी खुला गरेयता १७३ अर्ब रुपैयाँ विदेशी लगानी भित्रिएको छ। सरकारले यसअघि २०७३ सालमा पनि लगानी सम्मेलन गरेको थियो ।
के–के हुन्छ सम्मेलनमा ?
सम्मेलन दौरान नेपालले ७७ वटा परियोजना प्रस्तुत गर्ने छ । नेपालमा लगानी गरेका लगानीकर्ताको अनुभव, अन्तर्राष्ट्रिय लगानीकर्ताको नेपाल अनुभव समेटिएका पाँचवटा सत्र संचालन हुने आयोजकले जानकारी दएको छ ।
लगानीकर्तालाई मन परेको आयोजना निर्माण वा लगानी गर्ने अवसर दिइने छ ।
त्यस्तै, लगानीकर्तालाई यातायात, शहरी, कृषि पूर्वाधार, शिक्षा र स्वास्थ्य, औद्योगिक पूर्वाधार, हवाइ पूर्वाधार, पर्यटन र ऊर्जाका आयोजना छनोट गर्न दिइने छ । १२ परियोजनाका लागि सम्झौता र समझदारी हुने सम्मेलनमा गैरआवासीय नेपाली संघ र सरकारबीच पूर्वाधारमा लगानी गर्ने गरी १० अर्बको कोष स्थापना गर्ने सम्झौता हुने छ ।
प्रकाशित मिति: शुक्रबार, चैत १५, २०७५
-1732776560.jpg)
