विश्वको तेस्रो ठूलो प्रजातान्त्रिक देश इन्डोनेसियामा जोको विडोडो मङ्गलबार पुनः राष्ट्रपति पदमा निर्वाचित भएका छन् ।
जाकर्ता शहरमा कडा सुरक्षाबीच मङ्गलबार अप्रत्यासित रूपमा निर्वाचन परिणाम घोषणा गरिएको हो । सत्तासीन राष्ट्रपति विडोडोले ५५.५ प्रतिशत मत प्राप्त गरी पुनः राष्ट्रपति पदमा विजयी भएका त्यहाँको निर्वाचन आयोगले जनाएको छ ।
उनका निकटतम प्रतिद्वन्द्वी पूर्व सैनिक जनरल प्रबोबो सुविआन्तोले ४४.५ प्रतिशत मत प्राप्त गरेका थिए । निर्वाचन आयोगले मतगणना गरिसकेपछि स्थानीय समयअनुसार मङ्गलबार बिहान १ः४६ मा विडोडोलाई पुनः राष्ट्रपतिमा विजय भएको घोषणा गरेको थियो ।
इन्डोनेसियाका ३४ वटा प्रान्तका १३० शहरमा मतगणना गरिएको आयोगले जनाएको छ । सन् २०१४ मा पनि विडोडोले ५३.१५ प्रतिशत मत प्राप्त गरेका थिए भने उनका निकटतम प्रतिद्वन्द्वी प्रबिबो सुबिआन्तोले ४६.८६ प्रतिशत प्राप्त गरेका थिए ।
विश्वको सबैभन्दा ठूलो मुसलमान बाहुल्य रहेको इन्डोनेसियास्थित अमेरिकी राजदूताबासले उच्च सुरक्षा सतर्कताका लागि आह्वान गरेको थियो । जाकर्तामा निर्वाचन आयोगको कार्यालयलगायत जाकर्ताभर कडा सुरक्षा व्यवस्था गरिएको छ । सुरक्षाका लागि सयौँको सङ्ख्यामा सैनिक तैनाथ गरिएको थियो । यद्यपि, प्राबोबोले निर्वाचन आयोगको औपचारिक कागजातमा हस्ताक्षर गर्न मानेका छैनन् ।
उनले पाँचवटा प्रान्तमा निर्वाचन फेरि गराउनुपर्ने अडान लिएका छन् । यी प्रान्तमा धाँधली भएको प्राबोबोको दाबी छ ।
