पर्सा : भन्सार छलि नेपालबाट भारततर्फ अवैध रुपमा ३० केजी मरिच निकासी गर्ने कार्यमा संलग्न पाँच जनालाई आइतबार प्रहरीले पक्राउ गरेको छ । पक्राउ पर्नेहरुमा वीरगंज महानगरपालिका-२५ का उपेन्द्र कुमार सिंह, सोही महानगरपालिकाका जितेन्द्र कुमार सिंह, महेश साह, कृष्ण कुमार साह र सुभाष कटेल रहेका छन् ।
भन्सार चोरी निकासी नियन्त्रणका लागि जिल्ला प्रहरी कार्यालय पर्सा तथा सिमा प्रहरी चौकी छप्कैयाबाट संयुक्त रुपमा खटिएको प्रहरी टोलीले वीरगंज महानगरपालिका-१ स्थितबाट उक्त परिमाणको मरिच र मरिच निकासी गर्न प्रयोग गरिएको ग.१० प ७६३१ र ना २ प ९०५ नम्बरको मोटरसाइकल र दुई वटा साइकलसहित उनीहरुलाई पक्राउ गरेको बताइएकाे छ ।
साथै सोही प्रहरी टोलीले पर्साका बिभिन्न नाकाहरूबाट बेसार २ बोरा, पाउडर दुध ५० पिस, फेसवास ८ पिस, साइकल २ थान, मरिच ६० किलो र पम्प सेटको सामान १२ पिस समेत वेवारिसे अवस्थामा फेला पारी बरामद गरेको छ ।
