विराटनगर : उपप्रधान तथा रक्षामन्त्री ईश्वर पोखरेलले वर्तमान सरकारले प्रेसलाई नियन्त्रण गर्ने कल्पना पनि गर्न नसकिने बताएका छन् । विराटनगर विमानस्थलमा आज सञ्चारकर्मीहरूसँग संक्षिप्त कुरा गर्दै उनले प्रेस स्वतन्त्रता र लोकतन्त्रका लागि लडेको शक्ति प्रेसलाई वर्तमान सरकारले अङ्कुस लगाउने कुनै पनि कार्य नगर्नेमा ढुक्क हुन आग्रह गरे ।
कार्यवाहक प्रधानमन्त्रीसमेत रहेका पोखरेलले सरकारले ल्याउन लागेको मिडिया काउन्सिल विधेयकलाई थप व्यवस्थित बनाइने विचार व्यक्त गरे । उनले विधेयकले प्रेसलाई मर्यादित बनाई अनुचित र गैरजिम्मेवार ढङ्गले गर्ने कार्यलाई भने नियन्त्रण गर्ने बताए । विधेयकले नेपाली प्रेस जगतलाई व्यवस्थित र मर्यादित बनाउने उल्लेख गर्दै विधेयकलाई व्यवस्थित बनाउन आवश्यक सल्लाह र सुझावलाई सरकारले आत्मसात गरेर अघि बढ्ने उनले प्रष्ट पारे ।
पोखरेलले कार्यपालिकाले संवैधानिक अङ्गले संविधानसम्मत गरेको कार्यमा हस्तक्षेप गर्न नमिल्ने पनि बताए । लोकसेवा आयोगले कर्मचारी भर्ना प्रक्रिया समावेशी सिद्धान्तअनुसार अघि बढाएको भनेर प्रष्ट पारिसकेको अवस्थामा उनले अन्य कुरा सत्य नभएको दाबी गरे ।
उनले प्रदेशस्तरमा लोकसेवा आयोग नबनेको अवस्थामा स्थानीय निकायलगायत प्रदेशस्तरमा कर्मचारी पदपूर्तिका लागि सङ्घीय लोकसेवा आयोगले गरेको कर्मचारीको मागको विज्ञानलाई अनुचित भन्न नमिल्ने पनि बताए ।