काठमाडौं । सञ्चार तथा सूचना प्रविधिमन्त्री तथा सरकारका प्रवक्ता डा. युवराज खतिवडाले तत्काल देशभर ‘लकडाउन’ नहुने बताएका छन् ।
बिहीबार मन्त्रालयमा आयोजित पत्रकार सम्मेलनमा बोल्दै खतिवडाले यस्तो बताएका हुन् । गत सोमबार बसेको मन्त्रिपरिषद् बैठकका निर्णय सार्वजनिक गर्न आयोजित पत्रकार सम्मेलनमा बोल्दै सरकारका प्रवक्ता खतिवडाले पूर्ण लकडाउनको विषयमा सरकारले नसोचेको प्रष्ट पारे ।
उनले त्रसित भएर पूर्णरुपमा यसअघिजस्तै लकडाउन हुन्छ भन्ने मनस्थिति कसैले पनि नबनाउन आग्रह गरे ।
मन्त्री खतिवडाले अहिले पनि २ दर्जनभन्दा बढी स्थानीय तहमा लकडाउन गरिएको उल्लेख गर्दै संक्रमणको जोखिम भएका ठाउँमा मात्रै लकडाउन हुने बताए ।
‘कोभिडका कारण लकडाउन गरिरहँदा अरु रोगले नागरिकको मृत्यु नहोस् भन्ने विषयमा सरकार गम्भीर छ’, मन्त्री खतिवडाले भने ।
खतिवडाका अनुसार कोरोना संक्रमणको जोखिम नभएका ठाउँमा खुकुलो पार्ने र संक्रमण बढ्दै गएका ठाउँमा लकडाउनलाई कडा बनाउने तयारी सरकारले गरेको छ।
‘कोरोना संक्रमण घट्दै गएका जिल्लामा खुकुलो पार्ने र बढ्दै गएका जिल्लामा कडाइ गर्ने विषयमा सरकार लागेको छ’, उनले भने ।
पछिल्ला दिनमा संक्रमणको दर बढ्दै गएकाले तत्काल सार्वजनिक यातायात, अन्तर्राष्ट्रिय उडान र विद्यालय र खुला गर्ने अवस्था नरहेको बताएका छन् ।
मन्त्री डा. खतिवडाले सार्वजनिक यातायात र हवाई सेवा सञ्चालन गर्ने/नगर्ने विषयमा उदार भएर निर्णय गर्ने स्थिति नरहेको बताए ।
अहिलेको स्थिति रहिरहेमा उदार बनेर सार्वजनिक यातायात खोल्ने, विद्यालय सञ्चालन गर्ने र उडान गरिहाल्ने अवस्था नरहेको उनको भनाइ थियो ।
यस्तै, विदेशमा अलपत्र परेका व्यक्तिलाईमात्रै उद्धार गर्ने गरी हवाई उडानको व्यवस्था गरिने उनले बताए ।
प्रकाशित मिति: बिहीबार, साउन २२, २०७७ १९:२१
