काठमाडौँ । सत्तारुढ नेपाल कम्युनिस्ट पार्टी नेकपाका २ अध्यक्ष केपी शर्मा ओली र पुष्पकमल दाहालबीचको पान् टु वान् वार्ता सकिएकाे छ ।
अध्यक्षद्वयबीच बालुवाटारमा झण्डै डेढ घण्टा छलफल चलेको प्रधानमन्त्रीका प्रेस सल्लाहकार सूर्य थापाले बताए। उनीहरूबीच छलफललाई निरन्तरता दिने विषयमा कुरा भएको छ ।
समाचार स्राेतका अनुसार आगामी बैठकअघि पुनः छलफल गर्ने सहमित गरेर २ अध्यक्ष बैठकबाट उठेका थिए ।
आजको भेटमा नेकपा अध्यक्ष प्रचण्डले कुनै कार्यदल नबनाई २ जनाकै बीचमा वृहत छलफल गर्न जरूरी रहेको बताएका थिए ।
यसअघि दोस्रो तहका नेताहरुसहित बैठक बसेका ओली र दाहालबीच सोमबार एक्ला एक्लै छलफल चलेको हो ।
प्रधानमन्त्री समेत रहेका अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्ड तथा माधवकुमार नेपाल समूहबीचकाे टकराव बढ्दै जाँदा पार्टी फुटकाे संघारमा पुगेकाे छ ।
पार्टीकाे आन्तरिक विवाद बढ्दै जाँदा जारी स्थायी कमिटी बैठक पटक पटक स्थगित हुँदै आएकाे छ । यसअघि शनिबारका लागि तय भएकाे बैठक २ अध्यक्षबीच छलफल गर्ने भन्दै आजका लागि सारिएकाे थियाे ।
आजकाे बैठक पनि सहमति खाेज्न अध्यक्षद्वयबीच छलफल गर्नुपर्ने भन्दै बुधबार बस्ने गरी स्थगित गरिएकाे छ ।
प्रकाशित मिति: सोमबार, असार २२, २०७७ ०६:२५