काठमाडौं । नेपाल कम्युनिस्ट पार्टी (नेकपा) ले बामदेव गाैतमलाई राष्ट्रियसभा सदस्य बनाउने निर्णय गरेको छ ।
बुधबार बसेकाे नेकपा सचिवालय बैठकले पार्टी उपाध्यक्ष गौतमलाई राष्ट्रियसभा सदस्य बनाउने निर्णय गरेको हाे । प्रधानमन्त्री निवास बालुवाटारमा बुधबार बिहान नेकपाका अध्यक्षद्वय केपी ओली र पुष्पकमल ओलीबीच त्यस विषयमा अलग्गै भेटवार्ता भएको थियो । अध्यक्षद्वयको छलफलपछि सचिवालय बैठब बसेको हो ।
सचिवालयको बैठकले गौतमलाई राष्ट्रियसभामा लाने निर्णय गरेको प्रवक्ता नारायणकाजी श्रेष्ठले जानकारी दिए । राष्ट्रियसभामा खाली हुन लागेकाे अर्थमन्त्री युवराज खतिवडाको ठाउँमा गाैतमलाई लैजान लागिएकाे हाे ।
यसअघि गत माघमा भएको राष्ट्रियसभाको निर्वाचनमा उम्मेदवार बन्न नेताहरूले गौतमलाई आग्रह गरेका थिए तर उनले प्रधानमन्त्री बन्न नपाइने राष्ट्रियसभामा आफू नजाने बताए ।
यहीबीच केही दिनअघि नेकपाले राष्ट्रियसभा सदस्य पनि प्रधानमन्त्री बन्न पाउने गरी संविधान संशोधन गर्न माधवकुमार नेपालको संयोजकत्वमा कार्यदल बनाएको थियो ।
तर बुधबार बसेकाे बैठकले संविधान संशोधनको अध्ययन गर्न बनाइएको कार्यदल भंग गर्ने निर्णय गरेको छ । तत्कालीन अवस्थामा कार्यदलको आवश्यकता नरहेकोले भंग गरिएको श्रष्ठले बताए ।
बैठकमा एमसीसी सम्झौता र निवर्तमान सञ्चारमन्त्री गोकुल बाँस्कोटाका बारेमा छलफल नै नभएको श्रेष्ठको दाबी थियो ।
प्रकाशित मिति: बुधबार, फागुन १४, २०७६ ०७:३४