काठमाडाैं । नेपाल मजदुर किसान पार्टीको सातौँ महाविधेशन भोलि सुरु हुने भएको छ । नेमकिपाका सचिव प्रेम सुवालले विज्ञप्तिमार्फत नेमकिपाको तीन दिने महाधिवेशन शुक्रबार बिहान ११ बजे सुरु हुने जानकारी दिए ।
नेमकिपाका सचिव सुवालका अनुसार भक्तपुरको च्याहमासिंह, बोडे र काठमाडौँको कोटेश्वर गरी तीन ठाउँबाट एकैसाथ बाजागाजाका साथ र्याली सुरु गरी भक्तपुर सल्लाघारी चौरमा नेपाल मजदुर किसान पार्टीका अध्यक्ष नारायणमान बिजुक्छेले महाधिवेशनको उद्घाटन गर्ने छन् ।
नेपाल मजदुर किसान पार्टीले देशको सार्वभौमिकता रक्षा र प्रजातन्त्रको लागि स्थापनाकालदेखि नै साम्राज्यवाद र विस्तारवादविरुद्ध संघर्ष गर्दै आएको बताउँदै सचिव सुवालले नेपालको किसान आन्दोलन र भ्रष्टाचारविरोधी आन्दोलनमा पार्टीले महत्वपूर्ण भूमिका खेलेको बताए ।
उनले देशमा अहिले नेकपाको दुई तिहाइको सरकार भए पनि देशको खुला सिमानाका कारण सुरक्षित हुन नसकेको टिप्पणी गर्दै भारतले एकतर्फी रुपमा बनाएको बाँध र तटबन्धको कारण वर्सेनी तराई भूमि डुबानमा परिरहेको, हाल अहिले १३ खर्बभन्दा बढीको व्यापार घाटा रहेको, भ्रष्टाचार नियन्त्रण हुन नसकेको, महङ्गी बढ्दै गएको, ७० लाख नेपाली वैदेशिक रोजगारीमा जान बाध्य भएकोले यसको समस्याको समाधानका लागि नेमकिपाले आवाज उठाउँदै आइरहेको बताए ।
यसअघि नेमकिपाको छैठाैं महाधिवेशन २०७० साल चैत २१ गते काठमाडौँको खुल्ला मञ्चमा गरिएको थियो । पार्टी स्थापनाकालदेखि हालसम्म नारायणमान बिजुक्छे मात्रै पार्टीका अध्यक्ष हुँदै आएका छन् ।
हाल २५ सदस्यीय केन्द्रीय समिति रहेको नेमकिपामा साताैं महाधिवेशनले विधान संशोधनसहित विभिन्न दस्तावेज पारित गर्दै नयाँ कार्यसमिति निर्वाचित गर्ने बताइएको छ ।
प्रकाशित मिति: बिहीबार, असोज २, २०७६ १८:२५
