हेटौडा : नेपाली कांग्रेसका नेता प्रदीप पौडेलले गणतन्त्र ल्याउन ठूलो योगदान दिएका राजधानीका नेवार समुदायको भावनमा गम्भीर कुठाराघात गर्दे सरकारले गुठी विधेयक ल्याएको आरोप लगाएका छन् ।
हेटौडामा शुक्रबार पत्रकारहरुसँगको भेटमा नेता पौडेलले गुठी विधेयकले प्राचिन संस्कृति तथा सम्पदामा गम्भीर हमला गर्ने भएकाले तत्काल फिर्ता लिन ध्यानाकर्षण गराएका हुन् ।
गुठी विधेयक विरुद्धको आन्दोलनले सरकार ढल्ने भन्दा पनि सरकारको गलत रवैयाका कारण वर्तमान संविधानमै बुहसंख्यकको अनास्था उत्पन्न हुने चिन्ता बढेको छ पौडेलले भने । गुठीलाई सामन्तवादको स्वरुप भन्ने सरकारी प्रवक्ताको अभिव्यक्तिको कडा प्रतिवाद गर्दै पौडेलले विगतका घटनाक्रम स्मरण गराउँदै सांस्कृतिक क्षेत्रमा अनावश्यक हस्तक्षेप नगर्न चुनौति दिए ।
बेग्लै प्रसंगमा पौडेलले दुई तिहाईको वर्तमान सरकार दिनप्रतिदिन निरिह हुँदै गएको टिप्पणी गरे । यातायात भाडा वृद्धिको निर्णयमा पाँच घण्टा पनि टिक्न नसक्ने सरकारबाट जनताले के अपेक्षा गर्ने पौडेलले प्रश्न गरे । राजपत्रमा प्रकाशित भइसकेको सार्वजनिक खरिद नियमावलीलाई केही हप्तामै संशोधन गरेर सरकारले आफूलाई अत्यन्त कमजोर प्रमाणित गरेको उनको भनाइ थियो ।
प्रकाशित मिति: शुक्रबार, जेठ ३१, २०७६ १६:३९